ຜູ້ປະກອບການທ່ອງທ່ຽວລາວ ຢູ່ຍາກ ຍ້ອນຕ່າງຊາຕເຂົ້າມາມີບົດບາດ

ພູວົງສ໌
2019-11-07
ອີແມວລ໌
ຄໍາເຫັນ
Share
ພິມ
ການແລ່ນເຮືອຂ້າມຟາກ ແລະ ເຮືອທ່ອງທ່ຽວ ຕາມລຳແມ່ນ້ຳຂອງ ເຂດບ້ານຊຽງແມນ, ນະຄອນຫຼວງພຣະບາງ ເມື່ອເດືອນກໍຣະກະດາ 2016
ການແລ່ນເຮືອຂ້າມຟາກ ແລະ ເຮືອທ່ອງທ່ຽວ ຕາມລຳແມ່ນ້ຳຂອງ ເຂດບ້ານຊຽງແມນ, ນະຄອນຫຼວງພຣະບາງ ເມື່ອເດືອນກໍຣະກະດາ 2016
RFA/PV

ໃນ​ປີ 2019 ນີ້, ຣັ​ຖ​ບານ​ລາວ​ ໄດ້​ປະ​ກາດ​ໃຫ້​ເປັນ​ປີ​ທ່ອງ​ທ່ຽວ​ລາວ-ຈີນ, ໂດຍ​ຕັ້ງ​ເປົ້າ​ໝາຍ​ດຶງ​ດູດ​ນັກ​ທ່ອງ​ທ່ຽວ​ຈີນ​ໃຫ້​ໄດ້ 1 ລ້ານ​​ຄົນ ຈາກ​ການ​ຕັ້ງເປົ້າ​ໝາຍ​ດຶງ​ດູດ​ນັກ​ທ່ອງ​ທ່ຽວ​ໝົດ​ປີ ໃຫ້​ໄດ້ 4 ລ້ານ 5 ແສນ​ຄົນ.

ຜ່ານ​ໄປ​ໄດ້ 9 ເດືອນ, ເປົ້າ​ໝາຍ​ດັ່ງ​ກ່າວ ເບິ່ງ​ຄື​ວ່າ​ມີ​ຄວາມ​ຄືບ​ໜ້າ​ເປັນ​ທີ່​ໜ້າ​ພໍ​ໃຈ​ພໍ​ສົມ​ຄວນ ເພາະ​ສາ​ມາດ​ດຶງ​ດູດ​ນັກ​ທ່ອງ​ທ່ຽວ​ຈີນ​ໃຫ້​ເຂົ້າ​ມາ​ທ່ຽວ​ລາວ​ເພີ້ມ​ຂຶ້ນ​ເຖິງ 26 ເປີ​ເຊັນ ເມື່ອ​ທຽບ​ໃສ່​ປີ​ກາຍ, ອີງ​ຕາມ​ການ​ຣາຍ​ງານ​ຈາກ​ໜັງ​ສື​ພິມ​ວຽງ​ຈັນ​ທາມ​ສ໌ ເມື່ອ​ເດືອນ​ຕຸ​ລາ​ ທີ່​ຜ່ານມາ, ໂດຍ​ອ້າງ​ອີງ​ຂໍ້​ມູນ​ຈາກທ່ານ ສູນ ມະ​ນີ​ວົງ​ສ໌, ເອກອະ​ທິ​ບໍ​ດີ​ກົມ​ພັ​ທ​ນາ​ການ​ທ່ອງ​ທ່ຽວ, ກະ​ຊວງ​ຖ​ແລງ​ຂ່າວ, ວັ​ທ​ນະ​ທັມ ແລະ ທ່ອງ​ທ່ຽວ​ຂອງ​​ລາວ.

ເຖິງ​ຢ່າງ​ໃດ​ກໍ​ຕາມ, ໂຕ​ເລ​ຂ​ນັກ​ທ່ອງ​ທ່ຽວ​ຈີນ ແລະ ນັກ​ທ່ອງ​ທ່ຽວ​ໂດຍ​ລວມ ຈະ​ເພີ້ມ​ຂຶ້ນຫຼາຍ ເມື່ອ​ທຽບ​ໃສ່​ປີ​ກາຍ, ແຕ່​ຜູ້​ປະ​ກອບ​ການ​ທ່ອງ​ທ່ຽວ​ພາຍ​ໃນ ພັດ​ພາ​ກັນ​ຈົ່ມ​ວ່າ ຜົ​ລ​ປໂຍດ​ທີ່​ໄດ້​ຮັບ​ຈາກ​ການ​ເຂົ້າ​ມາ​ຂອງ​ນັກ​ທ່ອງ​ທ່ຽວ​ຕ່າງ​ປະ​ເທດນັ້ນ, ມັນ​ຕົກ​ຢູ່​ທີ່​ໃຜ​ກັນ​ແທ້.

ຜູ້​ປະ​ກອບ​ການ​ທ່ອງ​ທ່ຽວ ​ທ່ານ​ນຶ່ງ ໃນ​ນະ​ຄອນຫຼວງວຽງ​ຈັນ ໄດ້​ໃຫ້​ສັມ​ພາດ​ແກ່​ຜູ້​ສື່​ຂ່​າວ​ ວິທຍຸ​ເອ​ເຊັຽ​ເສ​ຣີ ເມື່ອ​ທ້າຍ​ເດືອນ​ຕຸ​ລາ ວ່າ ປີນີ້ ນັກ​ທ່ອງ​ທ່ຽວ​ໂດຍ​ລວມ​ແມ່ນ​ເພີ້ມ​ຂຶ້ນ​ແທ້, ແຕ່​ຜົ​ລ​ປ​ໂຍດ​ຈາກ​ການ​ທ່ອງ​ທ່ຽວ ຍັງ​ຄົງ​ຕົກ​ເປັນ​ຂອງ​ຜູ້​ປະ​ກອບ​ການ​ຕ່າງ​ປ​ະ​ເທດ​ເປັນ​ສ່ວນ​ໃຫຍ່, ໂດຍ​ສະ​ເພາະ​ນັກ​ທ່ອງ​ທ່ຽວ​ຈີນ ແລະ ເກົາຫຼີໃຕ້ ທີ່​ເຂົ້າ​ມາ​ທ່ອງ​ທ່ຽວ​ລາວ, ແຕ່​ພັດ​ໃຊ້​ແຕ່​ບໍ​ຣິ​ການ​ຂອງ​ຜູ້​ປະ​ກອບ​ການ​ຂອງ​ຊາ​ຕ​ເຂົາ​ເຈົ້າເອງ​.

ສຽງ1: “ປີນີ້​ ເພິ່ນ​ເອີ້ນ​ວ່າ​ເປັນ​ປີ​ທ່ອງ​ທ່ຽວ​ລາວ​-ຈີນ. ຈີນນີ້​ເຂົ້າ​ມາ​ທ່ຽວ​ລາວ​ເຮົາຫຼາຍ​ໄດ໋. ຖື​ວ່າ​ຍ້າຍ​ຈາກ​ໄທ​ມາ​ເລີຍ​ກໍ​ວ່າ​ໄດ້​, ຫັ້ນ​ແຫຼ​ະ. ໂດຍ​ສ​ະເພາະ​ທີ່ຫຼວງ​ພ​ຣະ​ບາງຂຶ້ນ​ໄປ​ນີ້ ຄົນ​ຈີນ​ມາຫຼາຍ. ມັນ​ຣາຍ​ໄດ້​ຄວນ​ທີ່​ຈະ​ກະ​ຈາຍ​ໃຫ້​ຄົນ​ລາວ ຜູ້​ປະ​ກອບ​ການ​ຄົນ​ລາວ​ຄວນ​ຈະ​ມີ​ຣາຍ​ໄດ້. ຢ່າງ​ເຊັ່ນ​ໂຮງ​ແຮມ​ຫັ້ນ​ນ່າ, ມັນ​ກະ​ຄວນ​ເປັນ​ຄົນ​ລາວ​ເນາະ ນັກ​ທ່ອງ​ທ່ຽວ​ເຂົ້າ​ມາ ເຂົາ​ກະ​ຕ້ອງ​ໄດ້​ຮັບ. ຮ້ານ​ອາ​ຫານ ມັນ​ກະ​ຄວນ​ຈັດ​ຢູ່​ໃນ​ເຂດ​ຈັດ​ສັນ​ລວມ​ກັນ​ເລີຍ ເປັນ​ຮ້ານ​ອາ​ຫານ​ລາວ, ຮ້ານ​ອາ​ຫານ​ຈີນ​ແມ່ນ​ຫ​ຍັງ, ເຂົາ​ເຂົ້າ​ໄປ ໃຫ້​ເຂົາ​ສາ​ມາດ​ເຫັນ. ແຕ່​ມັນ​ຊິ​ແຕກ​ຕ່າງ ເຂົາ​ຄົນ​ຈີນ​ເຂົາ​ເອງ​ເລີຍ ທີ່​ເຂົາ​ມາ​ປະ​ມູລເອງ ມາ​ເຮັດ​ເອງ ມາ​ເປີດ​ເປັນ​ຮ້ານ​ອາ​ຫານ​ຮັບ​ທົວ​ເຂົາ​ເອງ. ຄົນ​ທີ່​ໄດ້​ແມ່ນ​ຜູ້​ໃດ? ຜູ້​ປະ​ກອບ​ການ​ຂອງ​ເຂົາ​ເອງ. ໂຮງ​ແຮມ​ເດ? ກະ​ຂອງ​ຄົນ​ຈີນ ມັນ​ຈະ​ເປັນ​ແບບນີ້​ເນາະ. ບໍ່​ໄດ້​ຫ​ຍັງ​ເລີຍ​ຄົນ​ລາວ​ເຮົາ, ມັນ​ເປັນ​ແບບນີ້.”

ທ່ານ​ກ່າວ​ຕື່ມ​ວ່າ ຜູ້​ປະ​ກອບ​ການ​ດ້ານ​ການ​ທ່ອງ​ທ່ຽວ​ຈີນ ແລະ ເກົາຫຼີໃຕ້ ເຂົ້າ​ມາ​ເປີດ​ບໍ​ຣິ​ການດ້ານ​ການ​ທ່ອງ​ທ່ຽວ​ແບບ​ຄົບ​ວົງ​ຈອນ ເຮັດ​ໃຫ້​ຜູ້​ປະ​ກອບ​ການ​ທ້ອງ​ຖິ່ນ ຍັງ​ບໍ່​ໄດ້​ຮັບ​ຜົ​ລ​ພອຍ​ໄດ້​ຈາກ​ໂຕ​ເລ​ຂ​ນັກ​ທ່ອງ​ທ່ຽວ​ທີ່​ເພີ້ມ​ຂຶ້ນ​ໃນ​ປີນີ້ ເທົ່າ​ທີ່​ຄວນ​ຈະ​ເປັນ.

ເຊັ່ນ​ດຽວ​ກັນ​ກັບ​ຜູ້​ປະ​ກອບ​ການ​ເຮືອນ​ພັກ ​ໃນ​ເຂດ​ນະ​ຄອນຫຼວງ​ພ​ຣະ​ບາງ ທ່ານ​ກໍ​ໄດ້​ກ່າວ​ຕໍ່​ຜູ້​ສື່​ຂ່າວ​ພວກ​ເຮົາ​ໃນ​ວັນ​ທີ 7 ພຶ​ສ​ຈິ​ກາ ວ່າ ຜູ້​ປ​ະ​ກອບ​ການ​ດ້ານ​ການ​ທ່ອງ​ທ່ຽວ​ຈີນ ເຂົ້າ​ມາ​ມີ​ບົດ​ບາດ​ໃນ​ນະ​ຄອນຫຼວງ​ພ​ຣະ​ບາງຫຼາຍ​ຂຶ້ນ​ເລື້ອຍໆ ຈົນ​ເຮັດ​ໃຫ້​ຜູ້​ປະ​ກອບ​ການ​ທ້ອງ​ຖິ່ນ​ຢູ່​ຍາກ, ເຖິງວ່າ​ສ​ມາ​ຄົມ​ຜູ້​ປະ​ກອບ​ການ​ເຮືອນ​ພັກ ແລະ ໂຮງ​ແຮມ ຈ​ະ​ເຄີຍ​ຮ້ອງ​ຂໍ​ໃຫ້​ພາກ​ສ່ວນ​ກ່ຽວ​ຂ້ອງ​ແກ້​ໄຂ​ບັນ​ຫາ​ດັ່ງ​ກ່າວ​ແລ້ວ, ແຕ່​ກໍ​ເຮັດ​ຫ​ຍັງຫຼາຍບໍ່​ໄດ້.

ສຽງ2: “ເອີ່​ກະ​ແມ່ນ ຕາມ​ຄວາມ​ຈິງ. ມັນ​ກໍ​ຄື​ວ່າ​ຫັ້ນ ເພາະ​ວ່າ​ເຂົາ​ເຈົ້າ​ເປັນ​ເຄືອ​ຂ່າຍ​ດຽວ​ກັນ​ເນາະ ເປັນ​ແບບ​ເຂົາ​ເຈົ້າ​ເປັນ​ພາ​ສາ​ຈີນ​ແດ່ ຈີນ​ບໍ​ຣິ​ຫານ​ແດ່​, ບາງ​ເທື່ອເຂົາ​ເຈົ້າ​ລົມ​ກັນ​ອາ​ຈ​ດີກວ່າ​ຄົນ​ລາວ​ເຮົາ​ເນາະ. ເຂົາ​ເຈົ້າ​ກໍ​ມັກ​ໄປ​ແຕ່​ທາງນັ້ນ​ພຸ້ນ​ໝົດ. ເພາະ​ວ່າ​ຄັນ​ບໍ່​ມີ​ເຂົາ​ເຈົ້າ​ກໍ ຄັນ​ເຂົາ​ເຈົ້າ​ບໍ່​ມີ​ບ່ອນນອນ ເຂົາ​ເຈົ້າ​ກໍ​ມາ​ນອນ​ຂອງ​ເຮົາ​ພີ້. ແຕ່​ອັນ​ນີ້​ເຂົາ​ເຈົ້າ​ມາ​ຕັ້ງ​ແລ້ວກໍ ເຂົາ​ເຈົ້າ​ກໍ​ໄປ​ພຸ້ນ ເຮົາ​ກໍ​ມັນ​ກໍ​ຂາດ​ໄປ. (ຜູ້​ສື່​ຂ່າວວິ​ທ​ຍຸ​ເອ​ເຊັ​ຽ​ເສ​ຣີ​ຖາມ: ຄື​ໂຕນີ້, ສ​ມາ​ຄົມ​ໂຮງ​ແຮມ​ອີ່​ຫ​ຍັງ​ພວກ​ເຮົາ​ກໍ​​ໄດ້ເຄີຍ ມີ​ການ​ຕໍ່ວ່າ​ຕໍ່​ຂານ​ຢູ່​ບໍ? ຕໍ່​ເຈົ້າ​ໜ້າ​ທີ່​ກ່ຽວ​ຂ້ອງວ່າ ຢ່າງ​ໜ້ອຍ​ຄວນ​ປົກ​ປ້ອງ​ຜູ້​ປະ​ກອບ​ການ​ທ້ອງ​ຖິ່ນ​ແດ່, ຈັ່ງ​ຊີ້​ຫັ້ນ​ນ່າ.) ຕອບ: ມັນ​ກໍ​ມີ​ແຕ່​​ວ່າ ໄທ​ເຮົາ​ກໍວ່າ​ເຮັດ​ຫ​ຍັງ​ກໍ​ບໍ່​ໄດ້.”

ບໍ່​ພຽງ​ແຕ່​ທຸ​ຣະ​ກິ​ຈ​ໂຮງ​ແຮມ, ເຮືອນ​ພັກ ແລະ ຮ້ານ​ອາ​ຫານ​ເທົ່າ​ນັ້​ນ ທີ່​ຖືກ​ຜູ້​ປະ​ກອບ​ການ​ຕ່າງ​ຖິ່ນ ເຂົ້າ​ມາ​ທ້າ​ທາຍທຸ​ຣະ​ກິ​ຈ​ຂອງ​ຕົນ. ຜູ້​ປະ​ກອບ​ການເຮືອ​ທ່ອງ​ທ່ຽວ ​ຂຶ້ນ​ລ່ອງຕາມ​ລຳ​ແມ່​ນ້ຳ​ຂອງ ແລະ ສາຍນ້ຳ​ຄານ ກໍ​ພ​ອຍ​ໄດ້​ຮັບ​ຜົ​ລ​ກະ​ທົບ​ໄປ​ນຳ​ດ້ວຍ ເພາະ​ໃນ​ປະ​ຈຸ​ບັນ, ມີ​ຜູ້​ປະ​ກອບ​ການ​ດ້ານ​ການ​ທ່ອງ​ທ່ຽວຈາກ​ຈີນ ແລະ ເກົາຫຼີ​ໃຕ້ ເຂົ້າ​ມາ​ເຮັດ​ທຸ​ຣະ​ກິ​ຈເຮືອ​ທ່ອງ​ທ່ຽວ​ແຂ່ງ​ກັບ​ພວກ​ຕົນ. ດັ່ງ​ຜູ້​ປະ​ກອບ​ການ​ເຮືອ​ທ່ອງ​ທ່ຽວ​ໃນ​ເຂດບ້ານ​ຊຽງ​ແມນ, ​ນະ​ຄອນຫຼວງພ​ຣະ​ບາງ ໄດ້​ກ່າວ​ຕໍ່​ຜູ້​ສື່​ຂ່າວ​ພວກ​ເຮົາ​ໃນ​ມື້​ດຽວ​ກັນ​ວ່າ:

ສຽງ3: “ມັນ​ມີ​ຈີນ ມີ​ຈີນ​ແຂ່ງ​ນຳ. ມີ​ຈີນ​ມີ​ເກົາຫຼີ​ໃຕ້, ເຂົາ​ເຈົ້າ​ເຂົ້າ​ມາ​ມີ​ສ່ວນ​ໃນ​ຂອດ​ບໍ​ຣິ​ການ ການ​ທ່ອງ​ທ່ຽວ. (ຜູ້​ສື່​ຂ່າວວິ​ທ​ຍຸ​ເອ​ເຊັ​ຽ​ເສ​ຣີ​ຖາມ: ຄັນ​ຊັ້ນ​ພວກ​ຈີນ​ກັບ​ພວກ​ເກົາຫຼີ​ໃຕ້​ເຂົາ​ເຂົ້າ​ມາ​ສັມ​ປະ​ທານ ເຮັດ​ແລ່ນ​ເຮືອ​ອີ່​ຫ​ຍັງ​ນີ້ ຖື​ວ່າ​ມີ​ຜົ​ລ​ກະ​ທົບ​ຕໍ່​ພວກ​ເຮົາ​ບໍ່?) ຕອບ: ເອີ່​ມີ ກະ​ມີ​ຜົ​ລ​ກະ​ທົບ​ເຣື້ອງ​ການ​ບໍ​ຣິ​ການ​ແຫຼະ, ເຮົາ​ກໍ​ບໍ່​ໄດ້​ໄປ. ເຮົາ​ກະ​ບໍ່​ໄດ້​ໄປຫຼາຍ ຄັນ​ຄົນ​ປະ​ເທດ​ເຂົາ​ເຈົ້າ ເຂົາ​ກະ​ເອົາ​ລະ​ເດ, ເຮົາ​ກະ​ບໍ່​ໄດ້. ເອີ່​ຂອງ​ປະ​ເທດ​ໃດ​ກະ​ປະ​ເທດນັ້ນ, ເຂົາ​ມີ​ເຮືອ​ຂອງ​ເຂົາ. ອັນ​ນີ້​ລະ​ແມ່ນ​ຕາມຫຼັກ​ມັນ​ແລ້ວ ຢູ່​ລາວ​ເຮົາ​ມັນ​ເປັນ​ແນວນີ້ ເຂົາ​ເຈົ້າ​ເຮັດລະ​ເຂົາ​ເຈົ້າ​ໃຫ້​ຄົນ​ລາວ​ເປັນ​ຜູ້​ອອກ​ຊື່​ຄົນ​ລາວ, ແຕ່​ເຂົາ​ເປັນ​ຜູ້​ເຮັດ​. (ຜູ້​ສື່​ຂ່າວວິ​ທ​ຍຸ​ເອ​ເຊັ​ຽ​ເສ​ຣີ​ຖາມ: ຫຼັງ​ຈາກ​ທີ່​ເກົາຫຼີ​ໃຕ້​ກັບ​ຈີນ ເຂົາ​ເຂົ້າ​ມາ​ສັມ​ປະ​ທານ ຫຼື​ວ່າ​ມາ​ແລ່ນ​ເຮືອ​ແຂ່ງ​ຈັ່ງ​ຊີ້ນີ້​ນ່າ ເຮັດ​ໃຫ້​ຣາຍ​ຮັບ​ພວກ​ເຮົາຫຼຸດ​ລົງ​ບໍ່ ຫຼື​ວ່າ​ລູກ​ຄ້າ​ຫຼຸດ​ລົງ​ບໍ່​ໂຕນີ້?) ຕອບ: ຫຼຸດ​ລົງ, ຫຼຸດ​ລົງຫຼາຍ.”

ໃນ​ຂ​ນະ​ດຽ​ວ​ກັ​ນ, ການ​ທ່ອງ​ທ່ຽວ​ໃນ​ແຂວງ​ຈຳ​ປາ​ສັກ ປີນີ້ ພັດ​​ຫງຽບ​ເຫງົາຫຼາຍ ເພາະ​ນັກ​ທ່ອງ​ທ່ຽວ​ຂ້ອນ​ຂ້າງ​ບາງ​ຕາ. ເຮືອນ​ພັກ ແລະ ໂຮງ​ແຮມ ກໍ​ບໍ່​ຄ່ອຍ​ມີ​ການ​ຈອງ​ລ່ວງ​ໜ້າ​ເຂົ້າ​ມາ ເມື່ອ​ທຽບ​ໃສ່ 2-3 ປີ​ຜ່ານ​ມາ ທັງ​ທີ່​ໃນ​ໄລ​ຍະ​ນີ້ ເປັນ​ຣະ​ດູ​ທີ່​ນັກ​ທ່ອງ​ທ່ຽວ​ຄວນ​ເຂົ້າ​ມາ​ທ່ຽວ​​ແລ້ວ. ດັ່ງ​ຜູ້​ປະ​ກອບ​ການ​ໂຮງ​ແຮມ​ໃນ​ນະ​ຄອນ​ປາ​ເຊ ນາງ​ນຶ່ງ ໄດ້​ກ່າວ​ຕໍ່​ຜູ້​ສື່​ຂ່າວ​ພວກ​ເຮົາ​ໃນ​ມື້​ດຽວ​ກັນ​ນີ້​ວ່າ:

ສຽງ4: “ບໍ່, ບໍ່​ຄ່ອຍ​ມີ​ປານ​ໃດ​ໄດ໋​ຫັ້ນ ໄລ​ຍະ​ນີ້. ເຮົາ​ກໍ​ບໍ່​ເຂົ້າ​ໃຈ​ຄື​ກັນ ມັນ​ເປັນ​ໄລ​ຍະ​ມັນ​ບໍ ຫຼື​ຈັ່ງໃດ, ບໍ່​ຄ່ອຍ​ເຫັນ. ປີນີ້ບໍ່​ຄ່ອຍ​ມີ​ປານ​ໃດ​ເດີ້. (ຜູ້​ສື່​ຂ່າວວິ​ທ​ຍຸ​ເອ​ເຊັ​ຽ​ເສ​ຣີ​ຖາມ: ສະ​ພາບ​ໂດຍ​ລວມ​ແລ້ວ ແຂກຖື​ວ່າ​ບາງ​ຕາບໍ່ປີນີ້ ຫຼື​ຈັ່ງ​ໃດ?) ຕອບ: ບໍ່​ຄ່ອຍ​ມີ​ນ່າ ໄລ​ຍະ​ນີ້ ມັນ​ໜ້ອຍ ບໍ່​ຮູ້​ສາ​ເຫ​ຕ.”

ທັງ​ໝົດ​ນັ້​ນ, ແມ່ນ​ສຽງ​ສະ​ທ້ອນ​ຂອງ​ຜູ້​ປະ​ກອບ​ການ​ທ້ອງ​ຖິ່ນ​ຈາກຫຼາຍ​ແຂວງ​ໃນ​ລາວ ທີ່​ກຳ​ລັງໄດ້​ຮັບ​ຄວາມ​ເຈັບ​ປວດ​ຈາກ​ຜູ້​ປະ​ກອບ​ການ​ຕ່າງ​ປະ​ເທດ ທີ່​ເຂົ້າ​ມາ​ເຮັດ​ທຸ​ຣະ​ກິ​ຈ​ແຂ່ງ​ກັບ​ພວກ​ຕົນ​ໃນ​ອຸ​ດ​ສາ​ຫະ​ກັມ​ການ​ທ່ອງ​ທ່ຽວ​ຂອງ​ລາວ ທີ່​ພວມ​ຂ​ຍາຍ​ໂຕນີ້ ແລະ ຮຽກ​ຮ້ອງ​ໃຫ້​ພາກ​ສ່ວນ​ກ່ຽວ​ຂ້ອງ ຫັນ​ມາ​ໃຫ້​ຄວາມ​ສຳ​ຄັນ​ຂອງ​ຜູ້​ປະ​ກອບ​ການ​ທ້ອງ​ຖິ່ນ. ຖ້າບໍ່​ດັ່ງ​ນັ້ນ, ຜູ້​ປະ​ກອບ​ການ​ທ້ອງ​ຖິ່ນ ກໍ​ອາ​ຈທຍອຍ​ລົ້ມ​ຫາຍ​ຕາຍ​ຈາກ​ໄປ​ເທື່ອ​ລະ​ໜ້ອຍໃນ​ທີ່​ສຸດ.

ຄໍາເຫັນ (0)
Share
ເຕັມຫນ້າ