ສວນໝາກມັງກອນຍອມຈ່າຍ ຄ່າຈ້າງ ຄົນງານລາວ

ໄຊຍາ
2019-07-19
ອີແມວລ໌
ຄໍາເຫັນ
Share
ພິມ
ສວນປູກໝາກມັງກອນ ຢູ່ທາງພາກໃຕ້ ຂອງລາວ
ສວນປູກໝາກມັງກອນ ຢູ່ທາງພາກໃຕ້ ຂອງລາວ
ຮູບພາບຈາກ : ນັກຂ່າວພົລເມືອງ

ບໍຣິສັດ ຫຼີງເຊີນ ຂອງຈີນ  ທີ່ເປັນເຈົ້າຂອງສວນໝາກມັງກອນ ຢູ່ບ້ານຊຽງແລທ່າ ເມືອງປາກງື່ມ ນະຄອນຫຼວງວຽງຈັນ ຍອມຈ່າຍຄ່າຈ້າງ ບຸກເບີກ ເນື້ອທີ່ສວນໝາກມັງກອນ 15 ເຮັກຕ້າ ໃຫ້ກັບຄົນງານລາວແລ້ວ ເຊິ່ງກ່ອນໜ້ານີ້ ເມື່ອເດືອນຜ່ານມາໄດ້ ປະຕິເສດບໍ່ຍອມຈ່າຍ, ໂດຍອ້າງວ່າ ບຸກເບີກເນື້ອທີ່ບໍ່ໄດ້ມາຕຖານ ແລະຈະຈ່າຍແຕ່ 23 ລ້ານ ຈາກຈໍນວນທັງໝົດ 80 ລ້ານກີບ. ດັ່ງ ເຈົ້າໜ້າທີ່ ບ້ານຊຽງແລທ່າ ໄດ້ກ່າວຕໍ່ນັກຂ່າວ RFA ເມື່ອວັນທີ 16 ກໍຣະກະດາ ວ່າ:

"ຂແນງການທີ່ວ່າກ່ຽວຂ້ອງ ເຂົາລົງມາສວນໝາກມັງກອນ ບ້ານຊຽງແລທ່າ ແກ້ໄຂເຣື່ອງທີ່ຂະເຈົ້າຫັ້ນ ໄຖດິນແລ້ວ ຈີນມັນໂກງແຮງງານ ຂອງພວກຄົນລາວ ທີ່ເອົາຣົດມາໄຖເດ້ຕົວະໂກງໄປໂກງມາ ເງິນກໍບໍ່ໄດ້ບາດນີ້ ບໍຣິສັດຂອງຈີນ ຫຼີງເຊີນນີ້ແຫຼະ ມາໄລ່ເບິ່ງເງິນຕົກຢູ່ 80 ປາຍລ້ານ ແລ້ວມັນຈະຈ່າຍແຕ່ 23 ລ້ານ."

ເຈົ້າໜ້າທີ່ກ່າວຕື່ມວ່າເມື່ອວັນທີ 11 ກໍຣະກະດາ ຜ່ານມາເຈົ້າໜ້າທີ່ເມືອງປາກງື່ມໄດ້ລົງມາສັ່ງໃຫ້ບໍຣິສັດ ຫຼີງເຊີນ ທີ່ປູກສວນໝາກມັງກອນ ຈ່າຍເງີນໃຫ້ຄົນງານລາວ 10 ຄົນ ທີ່ຮັບຈ້າງບຸກເບີກເນື້ອທີ່ ປູກໝາກມັງກອນ ໃຫ້ບໍຣິສັດ ເມື່ອປີ 2018 ໂດຍໃຫ້ຈ່າຍຈຳນວນ 80 ລ້ານເຕັມ.

ກ່ອນໜ້ານີ້ ບໍຣິສັດຫຼີງເຊີນ ຍອມຈ່າຍພຽງ 23 ລ້ານກີບ ໂດຍອ້າງວ່າ ໄດ້ຈ່າຍເງິນໃຫ້ນາຍໜ້າ ທີ່ໄປຕິດຕໍ່ຄົນງານມາບຸກເບີກ ສວນໝາກ ມັງກອນໄປແລ້ວ 50 ລ້ານກີບ ແລະນາຍໜ້າຄົນດັ່ງກ່າວ ໄດ້ເອົາເງິນຄ່າແຮງງານນັ້ນໜີໄປແລ້ວ.

ນອກຈາກນີ້ທາງ ບໍຣິສັດຍັງຕັ້ງ ເງື່ອນໄຂວ່າ ຕ້ອງຈັບໂຕນາຍໜ້າ ທີ່ເອົາເງິນໜີໄປ ແລະ ຂໍໃຫ້ເຈົ້າໜ້າທີ່ປັບໄໝເອົາເງິນກ້ອນດັ່ງກ່າວ ມາສົ່ງຄືນບໍຣິສັດໃຫ້ໄດ້.

ສ່ວນເງິນຄ່າແຮງງານທາງບໍຣິສັດ ຍິນດີຈ່າຍຕາມການຕົກລົງກັບ ເຈົ້າໜ້າທີ່ຫ້ອງການຂອງເມືອງ ທີ່ລົງມາໄກ່ເກັ່ຍ. ສວນໝາກມັງກອນ ຂອງ ບໍຣິສັດ ຫຼີງເຊີນ ຂອງຈີນ ມີເນື້ອທີ 15 ເຮັກຕ້າ ແຕ່ປູກໝາກມັງກອນແທ້ໆ ມີພຽງ 5 ເຮັກຕ້າ ເທົ່ານັ້ນ ສ່ວນອີກ 10 ເຮັກຕ້າ ແມ່ນປູກກ້ວຍຫອມ.

ເຕັມຫນ້າ