ຣັຖບານຮື້ຟື້ນສັນຍາ ຂຸດຄໍາ ອັດຕະປື ເຊກອງ

ໄມຊຸລີ
2019-05-01
ອີແມວລ໌
ຄໍາເຫັນ
Share
ພິມ
ການຂຸດຄົ້ນຄໍາ ຂອງ ບໍຣິສັດວັງຕັດ ຂຸດຄົ້ນບໍ່ແຮ່ຈໍາກັດ ຢູ່ເຂດວັງຕັດ ເມືອງຊານໄຊ ແຂວງອັດຕະປື ແລະ ເຂດເມືອງ ດາກຈຶ້ງ ແຂວງເຊກອງ
ການຂຸດຄົ້ນຄໍາ ຂອງ ບໍຣິສັດວັງຕັດ ຂຸດຄົ້ນບໍ່ແຮ່ຈໍາກັດ ຢູ່ເຂດວັງຕັດ ເມືອງຊານໄຊ ແຂວງອັດຕະປື ແລະ ເຂດເມືອງ ດາກຈຶ້ງ ແຂວງເຊກອງ
ຮູບພາບຈາກ : ນັກຂ່າວພົລເມືອງ

ຣັຖບານລາວ ໄດ້ເຊັນສັນຍາໃໝ່ ສັມປະທານ ຂຸດຄົ້ນຄໍາ ຢູ່ແຂວງອັດຕະປື ແລະ ແຂວງເຊກອງ ຍ້ອນສັນຍາ ສັມປະທານ ທີ່ຜ່ານມາ ບໍ່ມີຄວາມໂປ່ງໃສ ໃນການເປີດເຜີຍຣາຍຮັບ ແລະ ການຈ້າງແຮງງານ. ໃນວັນທີ 22 ເມສາ ທີ່ຜ່ານມາ, ຣັຖບານລາວ ເຊັນສັນຍາຄືນໃໝ່ ກັບບໍຣິສັດ ວັງຕັດ ຂຸດຄົ້ນບໍ່ແຮ່ ຈໍາກັດ ເພື່ອສືບຕໍ່ຂຸດຄົ້ນແຮ່ຄໍາ ຢູ່ເຂດວັງຕັດ ເມືອງຊານໄຊ ແຂວງອັດຕະປື ແລະ ເຂດເມືອງ ດາກຈຶ້ງ ແຂວງເຊກອງ ຫຼັງຈາກບໍຣິສັດດັ່ງກ່າວ ໄດ້ຂຸດຄົ້ນຄໍາ ເປັນເວລາ 10 ປີ. ຊາວແຂວງ ອັດຕະປື ທ່ານນຶ່ງ ຜູ້ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ເອເຊັຽເສຣີ ໃນວັນທີ 29 ເມສາ ວ່າ:

"ສາເຫດທີ່ມີການດັດແປງ ສັນຍາຄືນໃໝ່ ຍ້ອນວ່າ ການຂຸດຄົ້ນທີ່ຜ່ານມາ ບໍ່ມີການເປີດເຜີຍຣາຍຮັບ ທີ່ຈະແຈ້ງ ໂດຍທີ່ເຈົ້າຂອງ ບໍຣິສັດທີ່ ເປັນຄົນວຽດນາມ ກັບ ກະຊວງປ້ອງກັນປະເທດ ຂອງລາວ ເປັນຜູ້ດໍາເນີນການເອງ.”

ປະຊາຊົນແຂວງອັດຕະປື ທ່ານນີ້ ກ່າວອີກວ່າ ການຂຸດຄົ້ນຄໍາ ຢູ່ເຂດວັງຕັດ ເມືອງຊານໄຊ ແຂວງອັດຕະປື ແລະ ເມືອງດາກຈຶ້ງ ແຂວງເຊກອງ ສ່ວນຫຼາຍ ຈະເປັນຝ່າຍວຽດນາມ ເປັນຜູ້ມາດໍາເນີນການ, ໃນຂນະທີ່ ຝ່າຍລາວ ພຽງແຕ່ ເອົາເຈົ້າໜ້າທີ່ທະຫານ ມາປ້ອງກັນເຝົ້າຍາມ ເທົ່ານັ້ນ. ແລະວ່າ ບໍຣິສັດພຽງແຕ່ຈ່າຍເງິນ ໃຫ້ແຂວງອັດຕະປື ປີລະ 2 ແສນໂດລາ ເທົ່ານັ້ນ ແລະບໍ່ມີການ ຈ້າງກັມມະກອນລາວ ເຂົ້າເຮັດວຽກ. ອີງຕາມຂໍ້ມູນຈາກ ຊາວແຂວງອັດຕະປື ທ່ານນີ້.

ກ່ຽວກັບເຣື້ອງນີ້, ວິທຍຸ ເອເຊັຽເສຣີ ໄດ້ຕິດຕໍ່ຫາ ທ່ານ ພົງໄຊຊະນະ ໄຊຍະເສນາ ຜູ້ອໍານວຍການ ບໍຣິສັດວັງຕັດ ຂຸດຄົ້ນບໍ່ແຮ່ ຈໍາກັດ ເພື່ອຂໍຄໍາເຫັນ, ແຕ່ທ່ານປະຕິເສດທີ່ຈະໃຫ້ຄໍາເຫັນໃນເຣື້ອງນີ້. ເຖິງຢ່າງໃດກໍຕາມ, ປັດຈຸບັນ ບໍຣິສັດດັ່ງກ່າວ ກໍາລັງມີການສໍາຣວດ ແລະ ຂຸດຄົ້ນ, ດັ່ງເຈົ້າໜ້າທີ່ຜແນກພລັງງານ ແລະ ບໍ່ແຮ່ ແຂວງອັດຕະປື ໄດ້ກ່າວຕໍ່ເອເຊັຽເສຣີ ໃນວັນທີ 29 ເມສາ ວ່າ:

"ເພິ່ນກະຢູ່ໃນໄລຍະ ການຊອກຄົ້ນສໍາຣວດ ເຊັນສັນຍາກັບຮັຖບານ ກະຍັງວ່າເນາະ ອັນນີ້ ກະບໍ່ຮູ້ນໍາແຜນເພິ່ນ.”

ບໍຣິສັດວັງຕັດ ຂຸດຄົ້ນບໍ່ແຮ່ ຈໍາກັດ ມີທຶນຈົດທະບຽນ ມູນຄ່າ 25 ລ້ານ ໂດລາສະຫະຣັຖ ໂດຍ ແມ່ນການລົງທຶນ ພາຍໃນ 100 ເປີເຊັນ ແລະ ມີໄລຍະການສັມປະທານ 29 ປີ, ຊຶ່ງເຣີ້ມແຕ່ ປີ 2012 ຫາປີ 2041. ບໍຣິສັດວັງຕັດ ຂຸດຄົ້ນບໍ່ແຮ່ ຈໍາກັດ ແມ່ນປ່ຽນຊື່ ມາຈາກ ບໍຣິສັດຫຸ້ນສ່ວນ ວຽດ-ລາວ ບໍ່ແຮ່ ຈໍາກັດ ທີ່ເຂົ້າມາເຂົ້າມາຂຸດຄໍາ ຢູ່ ບ້ານວັງຕັດ ເມືອງຊານໄຊ ແຂວງອັດຕະປື ຮ່ວມກັບກະຊວງ ປ້ອງກັນປະເທດລາວ ໃນເນື້ອທີ່ 250 ກິໂລຕາລາງແມັດ ໃນປີ 2006 ໂດຍແມ່ນຝ່າຍວຽດນາມ ເປັນຜູ້ຖືຫຸ້ນຫຼັກ ອີງຕາມຂໍ້ມູນ ຈາກ ເອກກະສານ ຂອງບໍຣິສັດ.

ແຕ່ ໃນວັນທີ 25 ມົກກະຣາ 2018 ທາງການລາວ ໄດ້ຊື້ບໍຣິສັດ ຫຸ້ນສ່ວນວຽດນາມ-ລາວ ບໍ່ແຮ່ຈໍາກັດ ມາເປັນ ບໍຣິສັດວັງຕັດຂຸດຄົ້ນບໍ່ແຮ່ ຈໍາກັດ ທີ່ເປັນຂອງຄົນລາວ.

ຄໍາເຫັນ (1)
Share

(

ການຂຸດຄົ້ນຄໍາຢູ່ວັງຕັດນັ້ນ ພວກເພີ່ນດໍາເນີນມາເປັນເວລາ 10 ກ່ວາປີແລ້ວ, ແລະແມ່ນໄຜເປັນຜູ້ໄຫ້ອານຸຍາດຂຸດ, ຕອບໄດ້ເລີຍວ່າຄືກະຊວງປອ້ງກັນປະເທດນັ້ນເອັງ ເພາະວ່າກະຊວງນີ້ນັ້ນມີສິດທຸກຢ່າງເຕັມ 100%ຢູ່ໃນປະເທດລາວໃນປະຈຸບັນນີ້ ໂດຍບໍ່ມີໄຜແຕະຕ້ອງໄດ້ເລີຍ, ອັນນີ້ສະແດງໄຫ້ເຫັນວ່າມັນໂຫ້ດຫ້ຽມຊໍ່າໄດ ກ່ຽວກັບພວກມີອໍານາດພັກດຽວ ທີ່ປົກຄອງປະເທດລາວໃນປະຈຸບັນ, ແມ້ແຕ່ທອງລຸນ ກໍຍັງບໍ່ມີອໍານາດເຕັມ ໃນການບໍລິຫານປະເທດແຕ່ຢ່າງໃດເລີຍ ແລະບອກໄດ້ເລີຍວ່າ ໂຄງການໄຫ່ຍໆຢູ່ໃນລາວ ທຸກຢ່າງແມ່ນກະຊວງປ້ອງກັນປະເທດ ຄວບຄຸມໝົດແນ່ນອນບໍ່ຕ້ອງສົງໃສເລີຍ.



[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 08, 2019 09:14 AM

ເຕັມຫນ້າ