ລາວ ໄທ ຮ່ວມມືສິນຄ້າ ເຂົ້າ-ອອກ

ມະນີຈັນ
2019-05-01
ອີແມວລ໌
ຄໍາເຫັນ
Share
ພິມ
ເສັ້ນທາງຣົດໄຟ ລາວ-ໄທ ທ່ານາແລ້ງ
ເສັ້ນທາງຣົດໄຟ ລາວ-ໄທ ທ່ານາແລ້ງ
RFA

ໃນຖານະທີ່ລາວເປັນປະເທດ ທີ່ບໍ່ມີທາງອອກສູ່ທະເລໂດຍກົງ ການຂົນສົ່ງຕ້ອງໄດ້ຜ່ານປະເທດອ້ອມຂ້າງ ເປັນຕົ້ນກໍແມ່ນໄທແລະວຽດນາມ. ແລະເວົ້າສະເພາະ ລາວແລະໄທ ເປັນປະເທດເພື່ອນບ້ານໃກ້ຄຽງ ທີ່ມີການພົວພັນ ແລະຮ່ວມມື ຊຶ່ງກັນແລະກັນ ດີຫຼາຍດ້ານຮວມທັງດ້ານ ການຂົນສົ່ງສິນຄ້າ ຜ່ານແດນ ຊຶ່ງໄທໃຫ້ຄວາມສະດວກ ທັງທາງດ້ານການກວດກາສິນຄ້າ, ການເກັບພາສີ ແລະທັງການຮ່ວມມື ທາງດ້ານ ວິຊາການ ແລະອຸປະກອນທີ່ຈຳເປັນຕ່າງໆ ທີ່ເຮັດໃຫ້ການຂົນສົ່ງສິນຄ້າ ຈາກລາວໄປໄທ ແລະຈາກໄທມາລາວ ສະດວກຂຶ້ນຫລາຍຢ່າງ ຕາມຄໍາເວົ້າຂອງ ທ່ານ ໄຊຢຸດ ຄໍາຄຸນ ທີ່ປຶກສາດ້ານການພັທນາ ຣະບົບຄວບຄຸມພາສີ ຫລື ສຸລກາກອນ ກົມພາສີ ກະຊວງການຄັງຂອງ ໄທ ໃນໂອກາດໃຫ້ສຳພາດ RFA ເມື່ອໄວໆມານີ້.

"ຂ້າພະເຈົ້າຄິດວ່າ ດ້ານພາສີ ໄທມີຄວາມສັມພັນ ທີ່ດີກັບທາງ ສປປ ລາວ ມາເປັນລະຍະເວລາດົນແລ້ວ ທັງໃນຣະດັບນະໂຍບາຍ ແລະ ຣະດັບກົມ ຊຶ່ງມີການເດີນທາງ ໄປມາຫາສູ່ ແລກປ່ຽນຄນະຜູ້ແທນ ເພິ່ມຄວາມສັມພັນໃນຣະດັບກົມ ຣະຫວ່າງ ອະທິບໍດີກົມສຸລກາກອນໄທ ແລະ ຫົວໜ້າກົມພາສີຂອງລາວ ມາໂດຍຕລອດ."

ແລະໃນຣະດັບທ້ອງຖິ່ນຣະຫວ່າງ 2 ປະເທດ ທ່ານກໍຄຶດວ່າ ບໍ່ວ່າດ່ານພາສີໜອງຄາຍ ຫລືດ່ານພາສີ ທີ່ມີຊາຍແດນຕິດກັບລາວ ຮວມເຖິງ ດ່ານຂອງລາວເອງ ກໍມີການໄປມາຫາສູ່ກັນ ມີກິຈກັມທາງສັງຄົມ ເພື່ອເພີ່ມການພົວພັນກັນມາໂດຍຕລອດ.

ນອກຈາກນີ້ ໃນສ່ວນຂອງນະໂຍບາຍ ຂອງກົມສຸລາກອນເອງ ກໍຍິນດີທີ່ຈະສນັບສນູນ ການດໍາເນີນງານຂອງກົມພາສີລາວມາໂດຍຕລອດ, ຈະເຫັນໄດ້ຈາກການເຊື້ອເຊີນ ເຈົ້າໜ້າທີ່ຈາກກົມພາສີຂອງລາວ ມາທັສນະສຶກສາ, ແລກປ່ຽນຄວາມຄຶດເຫັນ ແລະທາງຝ່າຍໄທ ກໍໄດ້ສົ່ງ ເຈົ້າໜ້າທີ່ ຂອງຕົນ ໄປແບ່ງປັນຄວາມຮູ້ ໃຫ້ແກ່ເຈົ້າໜ້າທີ່ ກົມພາສີ ຂອງລາວ ໃນເຣຶ່ອງຕ່າງໆ ບໍ່ວ່າຈະເປັນຂໍ້ຕົກລົງ ທາງດ້ານການຄ້າ ຣະຫວ່າງປະເທດ ພາຍໃຕ້ຂອບຂອງອົງການພາສີໂລກ, ຫລືໃນເຣຶ່ອງຂອງການນໍາເອົານະວັຕກັມ ເອົາເຄື່ອງມືດ້ານພາສີໃໝ່ໆ ຊຶ່ງຄິດວ່າ ຈະເປັນປະໂຫຍດ ສໍາລັບ ສປປລາວ. ທ່ານກ່າວ

"ຍົກຕົວຢ່າງ ເຣື່ອງການເອົາ IT ມາໃຊ້. ສິ່ງຕ່າງໆເຫລົ່ານັ້ນ ຂ້າພະເຈົ້າກໍເຊື່ອວ່າ ເຮົາມີຄວາມພ້ອມ ແລະກໍຍິນດີຈະສນັບສນູນ ເຈົ້າໜ້າທີ່ ກົມພາສີ ສປປລາວ ມາທັສນະສຶກສາ ແລະທັງສົ່ງເຈົ້າໜ້າທີ່ ໄທ ໄປໃຫ້ຄວາມຮູ້ແກ່ກົມພາສີລາວ ນໍາດ້ວຍ."

ສປປລາວ ໃນຖານະເປັນປະເທດບໍ່ຕິດກັບທະເລ ການຂົນສົ່ງສິນຄ້າ ເຂົ້າ-ອອກ ປະເທດ ໂດຍທົ່ວໄປແລ້ວ ຈະສົ່ງຜ່ານທ່າເຮືອແຫຼມສະບັງ ຂອງໄທ ຊຶ່ງກໍມີຫລາຍເພີ່ມຂຶ້ນ ໃນຣະຫວ່າງ 3 ປີຫລັງມານີ້ ແລະກໍມີແນວໂນ້ມເພີ່ມຂຶ້ນນຳເລື້ອຍໆ ໂດຍສະເພາະນັບຕັ້ງແຕ່ປີກາຍມາ -ຕາມຄໍາເວົ້າຂອງທ່ານ ໄຊຢຸດ ຄໍາຄຸນ:

"ກໍເປັນປີກາຍ ເຂົ້າໃຈວ່າ ໜ້າຈະເປັນໄປຕາມເສຖກິດ ຂອງປະເທດ ຂອງທາງລາວ ທີ່ມີການຂຍາຍຕົວທາງເສຖກິດ ຈໍານວນສິນຄ້າ ຜ່ານແດນ ກໍມີເພີ່ມຫລາຍຂຶ້ນເຊັ່ນກັນ,"

ຈະດ້ວຍປັດໃຈແນວໃດນັ້ນ ກໍຄົງບໍ່ສາມາດວິເຄາະໄດ້. ແຕ່ຕາມຄວາມເຂົ້າໃຈ ກໍຄືເນື່ອງຈາກຄວາມຕ້ອງການ ຂອງເສຖກິດຂຍາຍຕົວ.

ແລະເມື່ອຖາມວ່າ ໄທມີນະໂຍບາຍພິເສດໃຫ້ລາວແນວໃດບໍ ເວລາຂົນສົ່ງສິນຄ້າ ຈາກລາວມາໄທ, ທ່ານບອກວ່າ ນະໂຍບາຍພິເສດກໍຄົງ ບໍ່ມີຫຍັງ, ກໍຂຶ້ນກັບວ່າ ມັນເປັນການຂົນສົ່ງສິນຄ້າຈາກໄທໄປລາວ ຫລືເປັນລັກສະນະຂອງການຂົນສົ່ງຜ່ານແດນ. ຫາກເປັນການຂົນສົ່ງ ຜ່ານແດນ ຈາກປະເທດອື່ນຜ່ານໄທ ໄປລາວ, ໄທ ໃນຖານະເປັນປະເທດສະມາຊິກ ຂອງອົງການການຄ້າໂລກ ໄທກໍມີຂໍ້ຜູກພັນໃນເຣື່ອງ ຂອງການຜ່ານແດນ ຄືຈະໃຫ້ຄວາມສະດວກ ໃນເຣື່ອງຂອງການຜ່ານແດນ ເຊັ່ນການກວດກາສິນຄ້າເປັນຕົ້ນ:

"ເຊັ່ນເຮົາຈະບໍ່ເປີດກວດສິນຄ້າຜ່ານແດນ ຖ້າຫາກວ່າບໍ່ເກີດຄວາມສົງໃສ ຕາມທີ່ກໍານົດໄວ້ໃນກົດໝາຍສຸລກາກອນ."

ນອກຈາກບໍ່ເປີດກວດກາສິນຄ້າແລ້ວ ກໍຈະບໍ່ມີການສົ່ງເຈົ້າໜ້າທີ່ໄປຄຸມຣົດ ບໍ່ເກັບພາສີສໍາລັບສິນຄ້າຜ່ານແດນນັ້ນ.

ເມື່ອຖາມເຖິງການຂົນສົ່ງສິນຄ້າຈາກໄທໄປລາວ ຈະໃຊ້ເວລາດົນປານໃດ ທ່ານບອກວ່າຕອບຍາກ, ມັນຂຶ້ນຢູ່ກັບຜູ້ປະກອບການຂົນສົ່ງເອງ ແລະກໍຂຶ້ນຢູ່ກັບຜູ້ຄວບຄຸມຍານພາຫານະ ສົມມຸດວ່າ ຂົນສິນຄ້າຈາກແຫລມສະບັງ ໄປປະ ເທດລາວ ຈະໃຊ້ເວລາເທົ່າໃດ ທາງກົມຂອງ ພວກທ່ານ ກໍບໍ່ຮູ້ຄັກແນ່. ແຕ່ວ່າໃນສ່ວນຂອງພາສີເອງ ແມ່ນໃຊ້ເວລາໃນການກວດສິນຄ້າບໍ່ຫລາຍ, ຖ້າເປັນສິນຄ້າຜ່ານແດນ ພວກເຮົາ ກໍບໍ່ໄດ້ກວດ:

"ແຕ່ໃນຂນະດຽວກັນ ຖ້າເປັນສິນຄ້າທີ່ສົ່ງອອກຈາກໄທໄປລາວ ການເປີດກວດສິນຄ້າ ກໍເປີດກວດໃນເປີເຊັນທີ່ຕໍ່າ ເນື່ອງຈາກວ່າສິນຄ້າ ທີ່ ສົ່ງອອກຂອງເຮົາ ມັນບໍ່ມີຄ່າພາສີ. ຄິດວ່າ ຢູ່ຈຸດຜ່ານແດນອອກໄປ ໜ້າຈະໃຊ້ເວລາບໍ່ເກີນເຄິ່ງຊົ່ວໂມງ ຫລື 15 ນາທີຊໍ້າ. ເຊັ່ນຢູ່ດ່ານ ໜອງຄາຍ ກໍຈະໃຊ້ເວລາບໍ່ດົນ."

ເມື່ອຖາມວ່າ ທ່ານມີຄວາມຄຶດເຫັນແນວໃດ ຕໍ່ນະໂຍບາຍເຊື່ອມຕໍ່ທາງບົກ ຫລື Land-linked ຂອງລາວ ເພື່ອທົດແທນໃຫ້ແກ່ການເປັນ Landlocked ຫລື ປະເທດບໍ່ຕິດກັບທະເລນັ້ນ ທ່ານຕອບວ່າ ລາວກໍຕ້ອງຍອມຮັບຄວາມຈິງທີ່ວ່ານີ້. ແຕ່ສັກກະຍະພາບ ຫລືຄວາມສາມາດ ທີ່ສໍາຄັນແນວນຶ່ງຂອງລາວ ຄືສາມາດເປັນປະເທດເຊື່ອມຕໍ່ທາງບົກໄດ້, ຖ້າເບິ່ງແຜນທີ່ ກໍຈະເຫັນໄດ້ວ່າ ພູມີປະເທດຂອງລາວ ສາມາດ ເຊື່ອມໂຍງກັນກັບບັນດາປະເທດ ໃນເຂດແມ່ນໍ້າຂອງ ຫລື GMS ໄດ້:

"ຍົກຕົວຢ່າງ ລາວສາມາດເຊື່ອມໂຍງ ກັບປະເທດຈີນ ໄທ ວຽດນາມ ກັມພູຊາ ໄດ້. ລາວມີພູມີປະເທດ ທີ່ເອື້ອອຳນວຍໃຫ້ແກ່ການເປັນ ເຊື່ອມຕໍ່ທາງບົກ ແລະຈະສາມາດເຮັດ ໃຫ້ລາວເປັນສູນກາງ ເຊື່ອມໂຍງທາງການຄ້າ ແລະເສຖກິດກັບປະເທດຕ່າງໆ ໃນພູມີພາກ ແມ່ນໍ້າຂອງ."

ແລະຕໍ່ຄໍາຖາມວ່າ ເພື່ອຄວາມສະດວກຕື່ມ ໃນການຂົນສົ່ງສິນຄ້າເຂົ້າອອກ ປະເທດຂອງຕົນທ່ານຄຶດວ່າ ສປປລາວ ຄວນຈະເຮັດແນວໃດ ທ່ານບອກວ່າ ແທ້ຈິງແລ້ວ ໃນຖານະທີ່ລາວ ເປັນທັງສະມາຊິກ 6 ປະເທດ GMS ແລະ 10 ປະເທດອາຊຽນ ທ່ານຈຶ່ງຄຶດວ່າ ພາຍໃຕ້ ຂອບການລົງທຶນຕ່າງໆ ທາງເສຖກິດ ຊຶ່ງເປັນໂຄງການທີ່ ອາຊຽນ ແລະ GMS ເຮັດຮ່ວມກັນເພື່ອຊຸກຍູ້ໃຫ້ເສຖກິດ ຂຍາຍຕົວຫຼາຍຂຶ້ນ ຍົກຕົວຢ່າງ ຂໍ້ຕົກລົງວ່າດ້ວຍການຜ່ານແດນ ຂອງອາ ຊຽນ ຫລືຂໍ້ເຕົກລົງຜ່ານແດນ ຂອງ GMS ຮວມທັງໃນເຣື່ອງ ການທີ່ຈະເຊື່ອມໂຍງ ຂໍ້ມູນຂ່າວສານ ຣະຫວ່າງປະເທດອາຊຽນ ດ້ວຍກັນ ພາຍໃຕ້ການເຊື່ອມໂຍງ ໃນສ່ວນທີ່ເອີ້ນກັນວ່າ Form D ຊຶ່ງເປັນເອກສານ ທີ່ສະແດງເຖິງການຮັບ ຮອງກໍານົດຂອງສິນຄ້າ -ທ່ານກ່າວ:

"ຄືໃນສ່ວນນີ້ ເປັນໂຄງການ ທີ່ອາຊຽນ ແລະ GMS ໄດ້ເຮັດຂຶ້ນ ຊຶ່ງຂ້າພະເຈົ້າຄຶດວ່າຈະເຮັດໃຫ້ປະເທດລາວ ສາມາດຂຍາຍຕົວທາງ ເສຖກິດ ໄດ້ດີຂຶ້ນນັ້ນ ຄືການເຂົ້າຮ່ວມໃນຂໍ້ຕົກລົງຕ່າງໆ ບໍ່ວ່າຈະມາຈາກ GMS ຫລື ASEAN."

ໂດຍສະເພາະ ໃນເຮື່ອງການເຊື່ອມໂຍງຂໍ້ມູນ ຂ່າວສານ ໃນສ່ວນຂອງເອກສານຮັບຮອງຖິ່ນ ກໍາເນີດສີນຄ້າ ຫລື Form D ຊຶ່ງອາຊຽນ ກໍມີເປົ້າໝາຍ ທີ່ຈະເຊື່ອມໂຍງອາຊຽນທັງ 10 ປະເທດໃນເຣຶ່ອງ Form D ເຂົ້າກັນພາຍໃນປີນີ້. ຖ້າຫາກລາວ ສາມາດເຂົ້າຮ່ວມ ໃນໂຄງການນີ້ໄດ້ ທ່ານກໍເຊື່ອວ່າ ຈະເປັນປະໂຫຍດ ສໍາລັບ ການຄ້າ ຣະຫວ່າງປະເທດ ຣະຫວ່າງອາຊຽນ ແລະລາວ ໄດ້ເປັນຢ່າງດີ.

ນັ້ນຄືຄໍາພາດຂອງທ່ານ ໄຊຢຸດ ຄໍາຄຸນ ທີ່ປຶກສາດ້ານການພັທນາຣະບົບ ຄວບຄຸມທາງພາສີ ກົມພາສີ ກະຊວງການຄັງຂອງໄທ ຕໍ່ RFA ທີ່ບາງກອກ ປະເທດໄທ ເມື່ອໄວໆມານີ້.

ເຕັມຫນ້າ