ສຳນັກງານນາຍົກ ຍື່ນມື ແກ້ບັນຫາ ການເງິນຈຸລພາກ

ໄຊຍາ
2019-08-22
ອີແມວລ໌
ຄໍາເຫັນ
Share
ພິມ
ສະຖາບັນການເງິນ ຈຸລພາກ ສາຂາບ້ານສົງເປືອຍ ເມືອງນາຊາຍທອງ ນະຄອນຫຼວງວຽງຈັນ
ສະຖາບັນການເງິນ ຈຸລພາກ ສາຂາບ້ານສົງເປືອຍ ເມືອງນາຊາຍທອງ ນະຄອນຫຼວງວຽງຈັນ
Citizen Journalist

ເມື່ອສັປດາຜ່ານມາ ເຈົ້າໜ້າທີ່ຫ້ອງການ ສຳນັກງານນາຍົກຣັຖມົນຕຣີ ໄດ້ໄປຢ້ຽມຢາມ ແລະ ພົບພໍ້ກັບປະຊາຊົນ ທີ່ບໍ່ສາມາດຖອນເງິນຝາກ ຈາກສະຖາບັນການເງິນຈຸລພາກ ເພື່ອການພັທນາ ຕັ້ງຢູ່ບ້ານສົງເປືອຍໃຕ້,ເຂດເມືອງນາຊາຍທອງ ນະຄອນຫຼວງວຽງຈັນ ເຊິ່ງຄນະເຈົ້າໜ້າທີ່ ໄດ້ຮັບຟັງຂໍ້ຂ້ອງໃຈ ຂອງປະຊາຊົນ ພ້ອມກັບຮັບປາກວ່າ ຈະເລັ່ງແກ້ໄຂຄະດີນີ້ ແລະ ໃຫ້ປະຊາຊົນໄດ້ເງິນຄືນໄວທີ່ສຸດ, ດັ່ງເຈົ້າໜ້າທີ່ ເມືອງນາຊາຍທອງ ໄດ້ກ່າວຕໍ່ RFA ໃນວັນທີ 20 ສິງຫາ ວ່າ:

“ທິດແລ້ວນີ້ເນາະ ທາງສຳນັກງານນາຍົກ ຂະເຈົ້າເຂົ້າມາເອົາຂໍ້ມູນ ນຳປະຊາຊົນ ນຳພວກລູກຄ້າຫັ້ນແຫຼະ, ຂໍ້ມູນຄວາມຂ້ອງໃຈ ຂອງ ປະຊາຊົນຫັ້ນແຫຼະ ຂອງລູກຄ້າເຂົາເຈົ້າຝາກເງິນຫັ້ນ ເພິ່ນກະວ່າເລັ່ງ ກຳລັງເລັ່ງຄົ້ນຄວ້າ ກຳລັງເລັ່ງແກ້ໄຂ ໃຫ້ຢູ່ວ່າຊັ້ນ.”

ທ່ານກ່າວຕື່ມວ່າ ໃນຂນະດຽວກັນ ທາງທະນາຄານກາງ ກໍໄດ້ສົ່ງເຈົ້າໜ້າທີ່ ສະເພາະກິຈ ມາປະຈຳຢູ່ບ້ານສົງເປືອຍໃຕ້ ເພື່ອທະຍອຍເກັບ ໜີ້ເງິນກູ້ ຈາກບັນດາປະຊາຊົນ ທີ່ມາກູ້ຢືມເງິນ ຈາກສະຖາບັນການເງິນແຫ່ງນີ້ ແລ້ວຈະເອົາເງິນທີ່ໄດ້ຈາກ ການເກັບໜີ້ ມາໂຮມໄວ້ເພື່ອ ສົ່ງຄືນໃຫ້ແກ່ລູກຄ້າ ທີ່ລໍຖ້າຖອນເງິນຝາກນັ້ນ. ຖ້າທະນາຄານກາງ ບໍ່ລົງມາແກ້ບັນຫານີ້ໂດຍກົງ ສະຖາບັນດັ່ງກ່າວ ກໍຈະບໍ່ມີເງິນສົ່ງຄືນ ໃຫ້ລູກຄ້າ.

ກ່ອນໜ້ານີ້, ປະຊາຊົນທີ່ໄດ້ຮັບຄວາມເດືອດຮ້ອນ ຈາກສະຖາບັນການເງິນຈຸລພາກ ແຫ່ງນີ້ໄດ້ກ່າວຕໍ່ RFA ວ່າປະຈຸບັນ, ຕົນກຳລັງລໍຖ້າ ຖອນເງິນຝາກ ຈຳນວນ 10 ປາຍລ້ານກີບ ອອກຈາກສະຖາບັນແຫ່ງນີ້ ຍ້ອນຕ້ອງການເງິນຄືນມາໃຊ້ລົງທຶນ ໃນທຸຣະກິຈ ຄອບຄົວ, ແຕ່ກໍບໍ່ຮູ້ວ່າຈະໄດ້ເງິນເມື່ອໃດແທ້.

ເຫຕການສະຖາບັນການເງິນຈຸລພາກ ເພື່ອການພັທນາ ທີ່ໂກງເງິນປະຊາຊົນໄປ ຜ່ານມາເປັນເວລາ 1 ປີ 4 ເດືອນແລ້ວ ໃນຂນະທີ່ ທ້າວ ສົມຈິຕ ບຸນເລື່ອມ, ອະດີດປະທານສະຖາບັນການເງິນດັ່ງກ່າວ ພ້ອມກັບລູກນ້ອງອີກ 1 ຄົນ ທີ່ຖືກຈັບໃນຂໍ້ຫາຍັກຍອກ ເງິນຝາກ ຂອງ ປະຊາຊົນຈຳນວນ 19 ຕື້ກີບນັ້ນ, ຍັງບໍ່ມີຄວາມຄືບໜ້າເທື່ອວ່າ ຈະຖືກນຳໂຕຂຶ້ນສານເມື່ອໃດ.

ເຕັມຫນ້າ