ເຂື່ອນໄຊຍະບູຣີ ຢືນຢັນ ບໍ່ແມ່ນຕົ້ນເຫດ ເຮັດໃຫ້ນ້ຳຂອງ ບົກແຫ້ງ

ສຸພັດຕາ
2019-07-22
ອີແມວລ໌
ຄໍາເຫັນ
Share
ພິມ
ລາວ ແລະ ຜູ້​ບໍ​ຣິ​ຫານ ເຂື່ອນ​ໄຟ​ຟ້າ ໄຊ​ຍະ​ບູ​ຣີ ຈັດ​ພິ​ທີ ຖ​ແລງ​ຂ່າວ ໃນ​ໄລ​ຍະ ທົດ​ລອງ​ປັ່ນ​ກະ​ແສ​ໄຟ​ຟ້າ
ລາວ ແລະ ຜູ້​ບໍ​ຣິ​ຫານ ເຂື່ອນ​ໄຟ​ຟ້າ ໄຊ​ຍະ​ບູ​ຣີ ຈັດ​ພິ​ທີ ຖ​ແລງ​ຂ່າວ ໃນ​ໄລ​ຍະ ທົດ​ລອງ​ປັ່ນ​ກະ​ແສ​ໄຟ​ຟ້າ
RFA/PN

ເຂື່ອນ​ໄຊ​ຍະ​ບູ​ຣີ ບໍ່​ໄດ້ກັກ​ເກັບ​ນ້ຳ ​ເອົາ​ໄວ້ ເພື່ອ​ທົດ​ລອງ ຜ​ລິດ​ໄຟ​ຟ້າ ແລະ ບໍ່​ແມ່ນ ຕົ້ນ​ເຫດ ທີ່​ເຮັດ​ໃຫ້ ນ້ຳ​ຂອງ​ຕອນ​ລ່າງ ບົກ​ແຫ້ງ, ອິງ​ຕາມ ການຢືນ​ຢັນ ຂອງ​ທ່ານ ອາ​ນຸ​ພາບ ວົງ​ລະ​ຄອນ, ຮອງ​ກັມ​ມະ​ການ ຜູ້​ຈັດ​ການ ບໍ​ຣິ​ສັດ ຊີ​ເຄ ພາວ​ເວີ ຫຼື ຜູ້​ພັ​ທ​ນາ ເຂື່ອນ​ໄຟ​ຟ້າ ໄຊ​ຍະ​ບູ​ຣີ.

ທ່ານ ອາ​ນຸ​ພາບ ກ່າວ​ຕໍ່​ສື່ມວນ​ຊົນ ທີ່ພວມຢ້ຽມ​ຢາມ ​ເຂື່ອນ​ໄຊ​ຍະ​ບູ​ຣີ ໃນ​ວັນ​ທີ 22 ກໍ​ຣະ​ກະ​ດາ ນີ້ ວ່າ:

“ໂຮງ​ໄຟ​ຟ້າ ເຮົາ​ນີ້ ບໍ່​ມີ​ພື້ນ​ທີ່ ເກັບ​ນ້ຳ​ ຫຼື ມີ​ໜ້ອຍ​ຫຼາຍ ບໍ່​ສາ​ມາດ ທີ່​ຈະ​ໄປ​ຍຶດ​ເກັບ​ຫ​ຍັງ ໄດ້​ເລີຍ ເພາະ​ສະ​ນັ້ນ ມື້​ນີ້ ກໍ​ເຫັນ ຢ່າງ​ຈະ​ແຈ້ງ​ແລ້ວ​ວ່າ ເຮົາ​ບໍ່​ໄດ້​ໄປ ແຕະ​ຕ້ອງ ນ້ຳ ຕາມ​ທັມ​ມະ​ຊາດ ຕາມ​ຫຼັກ​ການ ຂອງ run-of-river ຫຼືຝາຍນໍ້າລົ້ນ ກໍ​ຄື in-flow ເທົ່າກັບ out-flow (ເຂົ້າ​ມາ ເທົ່າ​ໃດ ກໍ​ອອກ​ເທົ່ານັ້ນ​).”

ທ່ານ ກ່າວ​ຕື່ມ​ວ່າ ອີນ​-ຟ​ໂລວ໌ ເທົ່າ​ກັບ ອາວ​ທ໌-ຟ​ໂລວ໌ (In-flow ເທົ່າ​ກັບ Out-flow) ຄື​ຫຼັກ ໃນ​ການ​ດຳ​ເນີນ​ການ ໂຮງ​ໄຟ​ຟ້າ​ພະ​ລັງ​ງານ​ນ້ຳ ໄຊ​ຍະ​ບູ​ຣີ, ປະ​ຣິ​ມານ​ນ້ຳ ເຂົ້າ​ມາ​ເທົ່າໃດ ກໍ​ໄຫຼ​ອອກ ດ້ວຍ​ປະ​ຣິ​ມານ​ນ້ຳ ເທົ່າ​ເດີມ, ໂດຍ​ສະ​ເພາະ ໃນ​ປີ​ນີ້ ທີ່​ປະ​ຣິ​ມາ​ນ້ຳ​ຝົນ ມາ​ຫລ້າ​ຊ້າ ຈຶ່ງ​ເຮັດ​ໃຫ້ ລຳ​ນ້ຳ​ຂອງ ບົກ​ແຫ້ງ ໄປ​ຫຼາຍ.

ນອກ​ຈາກ​ນັ້ນ, ພື້ນ​ທີ່​ລຸ່ມ​ແມ່​ນ້ຳ​ຂອງ ໃນ​ເຂດ​ ປະ​ເທດ​ລາວ, ໄທ ແລະ ກັມ​ພູ​ຊາ ກໍ​ຍັງ​ຕ້ອງ ຜະ​ເຊີນ​ກັບ ບັນ​ຫາ ພັຍ​ແຫ້ງ​ແລ້ງ ຢ່າງ​ໜັກ ທີ່​ເກີດ​ຈາກ ສະ​ຖາ​ນະ​ການ ແອ​ລ ນີ​ໂຍ ປະ​ກອບ​ກັບ ເຂື່ອນ​ຈິ໋ງ​ຫົງ ຂອງ​ຈີນ ກັກ​ເກັບ​ນ້ຳ​ໄວ້ ແລະ ປ່ອຍ​​ນ້ຳອອກ​ມາ ​ພຽງ 60% ເທົ່າ​ນັ້ນ.

ປັດ​ຈຸ​ບັນ ປະ​ຣິ​ມານ​ນ້ຳ ຈາກ​ຂໍ້​ມູນ ສະ​ຖາ​ນີ ແທກ​ຣະ​ດັບ​ນ້ຳ ຫຼວງ​ພ​ຣະ​ບາງ ແທກ​ໄດ້ 1,428 ແມັດ​ກ້ອນ ຕໍ່​ວິ​ນາ​ທີ, ຊຶ່ງ​ຖື​ວ່າ ເປັນ​ປະ​ຣິ​ມານ ການ​ໄຫຼ ທີ່​ໜ້ອຍ​ກ​ວ່າ ປົກ​ກະ​ຕິ.

ໃນ​ຂະ​ນະ​ດຽວ​ກັນ, ທ່​ານ ພອນ​ໄຊ ພົງ​ສະ​ຫວັດ, ຫົວ​ໜ້າ ຜ​ແນກ​ພະ​ລັງ​ງານ ແລະ ບໍ່​ແຮ່ ແຂວງ​ໄຊ​ຍະ​ບູ​ຣີ ກ່າວ​ຕໍ່​ສື່ມວນ​ຊົນ ຕ່າງ​ປະ​ເທດ​ ໃນ​ມື້​ດຽວ​ກັນ​ນັ້ນ ວ່າ ເຂື່ອນ​ໄຟ​ຟ້າ​ໄຊ​ຍະ​ບູ​ຣີ ກໍ​ຣາຍ​ງານ ຣະ​ດັບ​ນ້ຳ  ໃຫ້​ກັບ ທາງ​ການ​ລາວ ປະ​ຈຳ​ທຸກ​ເດືອນ ກໍ​ບໍ່​ພົບ​ວ່າ ເຂື່ອນ​ໄຟ​ຟ້າ ໄຊ​ຍ​ະ​ບູ​ຣີ  ເປັນ​ຕົ້ນ​ເຫດ ໃຫ້​ແມ່​ນ້ຳ​ຂອງ ບົກ​ແຫ້ງ.

“ຕາມທີ່ ບໍ​ຣິ​ສັດ ໄດ້​ຣາຍ​ງານ ມາ​ແລ້ວ ທາງ​ເບື້ອງ​ຣັ​ຖ​ບານເຮົາ ກໍ​ໄດ້​ຮັບ​ຊາບ ຂໍ້​ມູນ ເປັນ​ປົກ​ກະ​ຕິ ແລ້ວ​ພວກ​ເຮົາ ຈະ​ພະ​ຍາ​ຍາມ ສັງ​ລວມ ເອົາ​ບັນ​ດາ ຂໍ້​ມູນ ການ​ໄຫຼ ຂອງ​ນ້ຳ​ໄຫຼ​ເຂົ້າ ແລ້ວ​ກໍ​ຂໍ້​ມູນ ການ​ໄຫຼ​ຂອງ​ນ້ຳ ອອກ​ຈາກ​ໂຄງ​ການ ຕາມ​ທີ່​ພວກ​ເຮົາ ຕິດ​ຕາມ​ລະ​ແມ່ນ ຮວມ​ທັງ ການ​ຢືນ​ຢັນ ບໍ​ຣິ​ສັດ ໂຄງ​ການ ລະ​ແມ່ນ ນຳ​ເຂົ້າ​ເທົ່າໃດ ລະ​ອອກ​ເທົ່າ​ນັ້ນ ເນາະ.”

ທ່ານ ພອນ​ໄຊ ຕາງ​ໜ້າ ຣັ​ຖ​ບານ​ລາວ ແລະ ເຂື່ອນ​ໄຟ​ຟ້າ ໄຊ​ຍະ​ບູ​ຣີ ຍັງ​ແຈ້ງ ຕໍ່​ສື່ມວນ​ຊົນ ຕື່ມ​ອີກວ່າ ຮຽກ​ຮ້ອງ ໃຫ້​ທາງ​ການ​ຈີນ ຮ່ວມ​ມື ແກ້​ໄຂ​ບັນ​ຫາ​ນີ້ ໄປ​ພ້ອມ​ກັນ, ໂດຍ​ສະ​ເພາະ, ເຣື່ອງ​ການ​ແຈ້ງ ລ່ວງ​ໜ້າ ກ່ອນ​ຈະ​ກັກ​ເກັບ​ນ້ຳ ເພື່ອ​ໃຫ້​ປະ​ເທດ​ລຸ່ມ​ແມ່​ນ້ຳ​ຂອງ ເກີດ​ການ​ບໍ​ຣິ​ການ ​ຈັດ​ການ​ນ້ຳ ໄດ້​ທັນ​ເວ​ລາ ຫຼື ຖ້າ​ເປັນ​ໄປ​ໄດ້ ໃນ​ໄລ​ຍະໜ້າ​ແລ້ງ ຄວນ​ງົດ​ກັກ​ນ້ຳ ເພື່ອ​ຫຼຸດ​ຜ່ອນ ຜົ​ລ​ກະ​ທົບ ຕໍ່​ຊຸມ​ຊົນ ແຄມ​ຝັ່ງ​ແມ່​ນ້ຳ​ຂອງ.

ແລະກ່ຽວກັບ ເຣື່ອງທີ່ເກີດຂຶ້ນ ໃນເຂດແມ່ນໍ້າຂອງ ຍານາງ ເປຣມຣຶດີ ດາວເຣືອງ ຜູ້ປະສານງານ ເຄືອຂ່າຍພາກປະຊາຊົນ ຈັບຕາເບິ່ງ ການລົງທຶນ ໃນເຂື່ອນລາວ ກໍໄດ້ກ່າວ ຕໍ່ວິທຍຸ ເອເຊັຽເສຣີ ໃນມື້ວັນທີ 18 ກໍຣະກະດານີ້ ຕອນນຶ່ງວ່າ:

"ຍານາງເວົ້າວ່າ ເຣື່ອງທີ່ເກີດຂຶ້ນ ໃນແມ່ນໍ້າຂອງ ຕອນນີ້ ຈະເອີ້ນກັນວ່າ ເຂື່ອນປະສົມໂລກຮ້ອນ ຊຶ່ງແນ່ນອນ ໃນໄລຍະ ຢ່າງໜ້ອຍ 5 ປີຫຼັງມານີ້ ສິ່ງທີ່ເຮັດໃຫ້ ເກີດການປ່ຽນແປງ ແຫ້ງແລ້ງຮຸນແຮງ ຝົນຕົກໜ້ອຍ ໃນຕອນເໜືອ ຂອງແມ່ນໍ້າຂອງ ຕ້ອງເບິ່ງໄປທີ່ເຂື່ອນ ເພາະເຂື່ອນ ເຮັດໃຫ້ ສະພາບ ຄວາມແຫ້ງແລ້ງ ຮຸນແຮງຫຼາຍຂຶ້ນ.” ແລະ ຈີນເອງ ກໍຕ້ອງສູ້ກັບ ບັນຫາພັຍແຫ້ງແລ້ງ ຊຶ່ງການເປີດ ການປິດເຂື່ອນ ຂອງຈີນ ກໍເຮັດໃຫ້ ແມ່ນໍ້າຂອງ ຜິດພ້ຽນຣະດູການໄປໝົດ.

ຄໍາເຫັນ (2)
Share

ຄົນ​ລາວ

ຈາກ ​ແຄມ​ຂອງ

ແມ່ນແທ້ບໍ ທີ່ວ່ານ້ຳຂອງແຫ້ງ ບໍ່ເປັນຍ້ອນເຂື່ອນ ບໍ່ແມ່ນວ່າ ເວົ້າໃຫ້ກັນດີໃຈຊື່ໆບໍ ວິທະຍຸເອເຊຍເສລີ ຄຳວ່າເຂື່ອນ ມັນກໍ່ຕ້ອງການນ້ຳຢູ່ແລ້ວ ບໍ່ຕັນໜ້ອຍກໍຕັນຫລາຍ ຂຶ້ນຢູ່ກັບ ເຂື່ອນໃຫຍ່ເຂື່ອນນ້ອຍ. ໃນຊ່ວງນີ້ ຢູ່ເຂດໃດ ນ້ຳກະບົກແຫ້ງຫລາຍ ເດືອດຮ້ອນໄປໝົດ ບວກກັບ ອາກາດຮ້ອນຕື່ມ ຍິ່ງເຮັດໃຫ້ ເກີດແຫ້ງແລ້ງ ບໍ່ມີຮອດນ້ຳຫົດຜັກ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jul 25, 2019 08:56 AM

(

Xayabouri dam is not the cause of the drought Laos is facing. The cause is the management of your country by a corrupt and incompetent leaders such as the Lao commie party-state.2019 will be the year to be remembered by Lao people.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jul 25, 2019 08:56 AM

ເຕັມຫນ້າ