ຂ.ເຊກອງ ຍັງມີຍິງສາວ ຖືກຕົວະ ໄປຂາຍ

ຈໍາປາທອງ
2019-08-23
ອີແມວລ໌
ຄໍາເຫັນ
Share
ພິມ
ການຄ້າມະນຸດ ແມ່ນຜິດຕໍ່ ກົດໝາຍປະເທດ ແລະກົດໝາຍສາກົນ
ການຄ້າມະນຸດ ແມ່ນຜິດຕໍ່ ກົດໝາຍປະເທດ ແລະກົດໝາຍສາກົນ
RFA

ອຳນາດການປົກຄອງ ແຂວງເຊກອງຂອງລາວ ຍັງກວດພົບແມ່ຍິງ ຖືກກຸ່ມຄ້າມະນຸດ ຕົວະຍົວະ ຫລອກລວງໄປຄ້າມະນຸດ ຢູ່ຕ່າງປະເທດ ຍ້ອນມີສາເຫດຫຼາຍຢ່າງ ຮວມທັງທາງການບໍ່ມີງົບປະມານ ໃນການໂຄສະນາ ໃຫ້ຄວາມຮູ້ກ່ຽວກັບ ເຣຶ່ອງການ ຄ້າມະນຸດ, ເຣຶ່ອງຜົນຮ້າຍ ຂອງການຄ້າມະນຸດ ແລະ ການປ້ອງກັນໃຫ້ປະຊາຊົນໄດ້ ຢ່າງທົ່ວເຖິງ, ດັ່ງ ເຈົ້າໜ້າທີ່ຜູ້ຮັບຜິດຊອບ ວຽກງານ ປ້ອງກັນການຄ້າມະນຸດ ແຂວງເຊກອງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 22 ສິງຫາ ນີ້ວ່າ:

"ຈຸດນຶ່ງກໍຄືພວກເຮົາບໍ່ໄດ້ເຊື່ອມຊຶມ ວິທີການປ້ອງກັນ ຂອງເຂົາຫັ້ນນ່າ ນິຕິກັມເລື້ອງກົດໝາຍ ອີ່ຫຍັງຕ່າງໆ ກໍຍອມຮັບແທ້ ກໍບໍ່ທັນໄດ້ ລົງໄປອີ່ຫລີ ກະອິງໃສ່ງົບປະມານແດ່ ຜ່ານມາຫັ້ນເຄີຍມີແລ້ວ ເຂົາຫລອກລວງກ່ຽວກັບ ການຄ້າມະນຸດ."

ຜ່ານມາ, ມີແມ່ຍິງ 2 ຄົນ ຢູ່ເມືອງລະມາມ ຖືກຄົນຕົວະຍົວະໄປເຮັດວຽກ ຢູ່ຕ່າງປະເທດ ຍ້ອນພວກເຂົາເຈົ້າທຸກຍາກ ແລະ ບໍ່ຮູ້ເທົ້າ ເຖິງການ ດັ່ງທ່ານກ່າວວ່າ:

"ຢູ່ເມືອງລະມາມຫັ້ນນ່າ ເຂົາຕົວະຍົວະ ໃຫ້ອອກແຮງງານ ແບບວ່າໄປຮັບຈ້າງ ຢູ່ຕ່າງປະເທດ ມີສອງຄົນ ຜູ້ນຶ່ງອັນໂຕນມາໄດ້ ແຕ່ວ່າ ຜູ່ນຶ່ງຫັ້ນບໍ່ໄດ້ ເຂົາໄປຢູ່ໃສກະຍັງບໍ່ຮູ້ ກຳລັງສືບສວນວ່າມັນເປັນແນວໃດ."

ເພື່ອແກ້ໄຂບັນຫາດັ່ງກ່າວ, ກົມສັງຄົມສົງເຄາະ ກະຊວງແຮງງານ ແລະ ສວັດດີການສັງຄົມ ໄດ້ຮ່ວມກັບກອງເລຂາຄນະກັມມະການ ຕ້ານການຄ້າມະນຸດ ຣະດັບຊາດ ແລະສົມທົບກັບທາງການເມືອງລະມາມ ແລະ ເມືອງທ່າແຕງ ແຂວງເຊກອງ ຈັດກອງປະຊຸມຮ່ວມກັນ ຂຶ້ນໃນມື້ວັນທີ 19 ສິງຫາ ນີ້, ເພື່ອໃຫ້ຄວາມຮູ້ແກ່ແມ່ຍິງ ໃຫ້ມີສະຕິຣະວັງຕົວ ແລະເພື່ອປົກປ້ອງສິດ ແລະຜົນປະໂຫຍດ ຂອງຜູ້ຖືກ ເຄາະຮ້າຍ ຈາກການຄ້າມະນຸດ.

ເຈົ້າໜ້າທີ່ທ່ານດຽວກັນນີ້ ກ່າວຕື່ມອີກວ່າ ແມ່ຍິງຢູ່ເມືອງລະມາມ ແລະເມືອງທ່າແຕງ ເປັນກຸ່ມເປົ້າໝາຍ ທີ່ຈະຕົກເປັນເຫຍື່ອ ຂອງການ ຄ້າມະນຸດ ດັ່ງນັ້ນຈະຕ້ອງໄດ້ມີການປົກປ້ອງ ພວກເຂົາເຈົ້າເອົາໄວ້ໃຫ້ດີ.

ຄໍາເຫັນ (1)
Share

ຍິງລາວ

ຈາກ ບ້ານນອກ

ໃນເວລາທີ່ ແມ່ຍິງເຮົາ ຖືກຊ່ວຍເຫລືອ ອອກມາໄດ້ຈາກ ທີ່ຄົນສ່ວນຫລາຍເອີ້ນວ່າ ການຄ້າມະນຸດນັ້ນ ມັກຈະເວົ້າຕະຫລອດວ່າ ແມ່ຍິງລາວ ຮູ້ເທົ່າບໍ່ເຖິງການ ບໍ່ມີຄວາມຮູ້ ບໍ່ຮູ້ວ່າ ເປັນໄພອັນຕະລາຍ ພັກລັດ ບໍ່ມີງົບປະມານ ໃນການລົງໂຄສະນາ. ຜູ້ໃດກໍຕາມ ທີ່ເວົ້າແນວນີ້ ແມ່ນຮູ້ເທົ່າບໍ່ເຖິງການ ປິດຫູຫລັບຕາເວົ້າ ນັກຂ່າວ ກະເອົາມາເວົ້າຕາມ.ໃຜຊິບໍ່ຮູ້ວ່າອັນຕະລາຍ ໃຜໆກໍຮູ້ໝົດ ແຕ່ບໍ່ມີທາງເລືອກ ໃນເມື່ອ ເຂົ້າໃນເລົ້າບໍ່ມີ ອາຫານບໍ່ມີໃນພາເຂົ້າ ດິນນາດິນສວນຖືກຍຶດ ພວກເຮົາ ບໍ່ມີທີ່ທໍາກິນ ຕ້ອງໄດ້ເລ້ລ້ອນ ອອກໄປສ່ຽງຕາຍ ລູກຫລາຍເຂົາອິດູຕົນພໍ່ແມ່ອິດູຕົນນ້ອງໆ. ວຽກເຮັດງານທໍາ ຢູ່ບ້ານກະບໍ່ມີ.ແຕ່ພັກລັດ ພັດວ່າ ຮູ້ເທົ່າບໍ່ເຖິງການ ບໍ່ຮູ້ເຖິງໄພອັນຕະລາຍ ພັກລັດ ບໍ່ມີງົບປະມານ ໃຫ້ຄວາມຮູ້. ພັກລັດຫັ້ນເອງ ຮູ້ເທົ່າບໍ່ເຖິງການ ບໍ່ຮູ້ຈັກບັນຫາ ຂອງປະຊາຊົນເຮົາ ບໍ່ຮູ້ຈັດຊີວິດການເປັນຢູ່ຂອງປະຊາຊົນເຮົາ. ຊອກເອົາງົບປະມານ ໄປຈ້າງຕ່າງປະເທດຫັ້ນນ່າ ມາເຝິກອົບຮົມ ເຈົ້າໜ້າທີ່ພັກລັດ ໃຫ້ເຂົ້າໃຈບັນຫາ ແລະ ໜ້າທີ່ຮັບຜິດຊອບ ຂອງຕົວເອງ.ພັກລັດນັ້ນແຫລະ ບໍ່ຮູ້ຈັກແກ້ໄຂບັນຫານີ້.ເວລາ ລົງເຜີຍແຜ່ມະຕິຍາມໃດ ກໍເອົາແຕ່ທິດສະດີເກົ່າມາເວົ້າວ່າ ລະບອບເກົ່າ ສັງຄົມເປື່ອຍເຍື່ອຍ ມີໄພສັງຄົມຫລາຍ.ພວກມີໄພສັງຄົມ ກະດຽວວ່າ ສົ່ງໄປດັດສ້າງ ຢູ່ດອນທ້າວດອນາງໝົດແລ້ວ. ສັງຄົມໃນເມືອງລາວ ປະຈຸບັນ ພັດແຫ່ງຫລາຍ ພ້ອມທັງ ນໍາເຂົ້າຈາກຈີນແລະຫວຽດນາມນໍາອີກ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 29, 2019 05:34 AM

ເຕັມຫນ້າ