ຮ້ານຄ້າຈີນລັກຂາຍ ອຸປກອນ ດາວທຽມ ເຖື່ອນ

ພູວົງສ໌
2019-08-26
ອີແມວລ໌
ຄໍາເຫັນ
Share
ພິມ
ຈານດາວທຽມ ຮັບສັນຍານ ຖ່າຍທອດໂທຣະທັສ ທີ່ຕິດຕັ້ງຢູ່ຕາມບ້ານເຮືອນ ຂອງປະຊາຊົນລາວ ຢູ່ທາງພາກເໜືອ
ຈານດາວທຽມ ຮັບສັນຍານ ຖ່າຍທອດໂທຣະທັສ ທີ່ຕິດຕັ້ງຢູ່ຕາມບ້ານເຮືອນ ຂອງປະຊາຊົນລາວ ຢູ່ທາງພາກເໜືອ
RFA

ເຈົ້າໜ້າທີ່ເມືອງວຽງພູຄາ ແຂວງຫຼວງນ້ຳທາ ລົງກວດກາ ແລະຍຶດຈານດາວທຽມ ແລະເຄື່ອງສັນຮັບຍານດາວທຽມທັງໝົດ 20 ຣາຍການ ຢູ່ຮ້ານຄ້າຈີນ ທີ່ນຳສິນຄ້າເຫຼົ່ານັ້ນ ເຂົ້າມາຂາຍແບບບໍ່ຖືກຕ້ອງຕາມກົດໝາຍ. ດັ່ງເຈົ້າໜ້າທີ່ຜແນກອຸດສາຫະກັມ ແລະ ການຄ້າ ແຂວງ ຫຼວງນ້ຳທາ ໄດ້ກ່າວຕໍ່ວິທຍຸເອເຊັຽເສຣີ ໃນມື້ວັນທີ 22 ສິງຫາ ນີ້ວ່າ:

“ຢູ່ເມືອງພວກຂ້າພະເຈົ້າ ນີ້ສ່ວນຫຼາຍມີແຕ່ຊາວຈີນ ຂາຍຈານດາວທຽມ ໂຕທີ່ເຮົາຍຶດນັ້ນ ຄືໂຕມັນບໍ່ໄດ້ຜ່ານບໍຣິສັດ ຫຼືວ່າໂຕດາວທຽມ ລາວຫັ້ນເນີ ແລະ ມັນມີສັນຍານຂອງລາວສະຕາຣ ແລະ ມັນບໍ່ມີສັນຍານເປັນພາສາລາວ ຫຼືວ່າບໍ່ໄດ້ນຳເຂົ້າ ແບບຜ່ານດ່ານຢ່າງຖືກ ຕ້ອງ. ໄປຕາມແຈ້ງການຕາມເອກກະສານ ທີ່ຂັ້ນເທິງເຂົາສັ່ງມາ ຫ້າມຂາຍ ໂຕນີ້ແທ້ ມັນກໍເປັນຣາຍການໃໝ່ເນາະ.”

ຈານດາວທຽມ ແລະ ເຄື່ອງຮັບສັນຍານດາວທຽມ ທີ່ຂາຍຢູ່ຮ້ານຄ້າຈີນ ຖືກລັກລອບເຂົ້າມາປະເທສລາວແຕ່ປີ 2015, ເຊິ່ງໃນເວລານັ້ນ ທາງການຍັງບໍ່ທັນມີຄຳສັ່ງ ໃຫ້ກວດກາ ແລະ ຍຶດສິນຄ້າທີ່ບໍ່ຖືກກົດໝາຍດັ່ງກ່າວ.

ການກວດຍຶດສິນຄ້າຂອງຈີນໃນຄັ້ງນີ້ ແມ່ນເພື່ອປົກປ້ອງຜົລປໂຍດ ຂອງບໍຣິສັດທີ່ເຂົ້າມາລົງທຶນດ້ານຈານດາວທຽມ ແລະເຄື່ອງຮັບສັນຍານ ດາວທຽມ ແບບຖືກຕ້ອງຕາມກົດໝາຍ ຢູ່ປະເທສລາວ. ດັ່ງທ່ານກ່າວຕື່ມອີກວ່າ:

“ມັນກໍຫຼັກໆ ທາງເຮົາກໍໃຊ້ຢູ່ເນາະ ໂຕນີ້ຢູ່ເຮືອນກໍໃຊ້ໂຕນີ້ຢູ່, ແຕ່ວ່າສັນຍານມັນບໍ່ຢາກໄດ້ ຫຼາຍຄົນກໍເຂົ້າໃຈວ່າ ຍ້ອນມີດາວທຽມລາວ ແລະ ເຂົາພຍາຍາມຕັດສັນຍານ ກໍບໍ່ຮູ້ວ່າແນວໃດ? ເຂົາເຈົ້າວ່າ ດາວທຽມບໍຣິສັດ ເຂົ້າມາລົງທຶນດາວທຽມ ໃນລາວ ມັນໄດ້ລົງທຶນ ຫຼາຍແລ້ວ ຢາກໃຫ້ທາງເຮົາທາງຣັຖ ຊ່ວຍຄຸ້ມຄອງກັນໄປ. ໄທເຮົາກໍເບິ່ງຕາມເອກກະສານ ຂັ້ນເທິງສົ່ງມາ, ປະຕິບັດຕາມນັ້ນ.”

ເຄື່ອງດາວທຽມທີ່ຍຶດມາໄດ້ ມີທັງສິນຄ້າໝົດອາຍຸ ແລະ ສິນຄ້າບໍ່ໄດ້ມາຕຖານອື່ນໆ ເຈົ້າໜ້າທີ່ຈະເອົາໄປທຳລາຍຖິ້ມໃຫ້ໝົດ.

ເຕັມຫນ້າ