ຣັຖບານຂາດງົບປະມານ ສ້ອມແປງ ໂຮງຮຽນ

ສຸພັດຕາ
2019-03-05
ອີແມວລ໌
ຄໍາເຫັນ
Share
ພິມ
ໂຮງຮຽນ ໃນເຂດຊົນບົດ ສປປ ລາວ
ໂຮງຮຽນ ໃນເຂດຊົນບົດ ສປປ ລາວ
RFA/PN

ໃນປີນີ້, ຣັຖບານຍັງຈະບໍ່ອະນຸມັດງົບປະມານ, ສ້ອມແປງໂຮງຮຽນປະຖົມ ບ້ານພ້າແລະບ້ານກຸມ, ເມືອງຜາໄຊ, ແຂວງຊຽງຂວາງ ເພາະ ຕ້ອງໄດ້ໃຫ້ງົບປະມານບ່ອນອື່ນ ທີ່ຈໍາເປັນກ່ອນ, ຮອດປີໜ້າກໍຍັງຈະບໍ່ ອະນຸມັັດໃຫ້ຄືເກົ່າ, ຕ້ອງໃຫ້ລໍຖ້າຈົນເຖິງ ປີ 2021 ຈຶ່ງຈະຮັບ ພິຈາຣະນາ ໃຫ້ງົບປະມານ, ປັດຈຸບັນ ສະພາບຂອງໂຮງຮຽນຫຼັງດັ່ງກ່າວນັ້ນ ກໍຊຸດໂຊມຫຼາຍ, ຫລັງຄາສັງກະສີກໍຮົ່ວ, ຝາແອ້ມຫ້ອງຮຽນ ກໍເປ່ເພ. ຕາມຄໍາເວົ້າຂອງເຈົ້າໜ້າທີ່ ຜແນກສຶກສາທິການ ແລະກິລາ ແຂວງຊຽງຂວາງ ໃນວັນທີ 5 ມິນາ ນີ້:

“ສເນີຣັຖບານໄປ 4 ປີ ແລ້ວບໍ; ພື້ນຖານໂຄງລ່າງເພິ່ນບໍ່ອະນຸມັດສ້າງ, ດ້ານງົບປະມານບໍ່ພຽງພໍ, ລົງທຶນແຕ່ບ່ອນຈໍາເປັນກ່ອນ, ປີ 2020 ກໍ່ຈະບໍ່ໄດ້, ເພາະປີນີ້ ເພິ່ນກໍ່ບໍ່ໃຫ້ສເນີ ໂຄງການລົງທຶນຈໍານວນນີ້ອີກ, ອາຈຍັງປີນີ້, ປີໃໝ່ຖືວ່າຣັຖບານໃຫ້ ຄໍາຕອບວ່າບໍ່ມີທຶນສນອງ ໃຫ້ແລ້ວ.”

ຮອດປັດຈຸບັນ ກໍບໍ່ມີໂຄງການໃດ ທັງໃນແລະຕ່າງປະເທດເຂົ້າມາຊ່ອຍທຶນສ້ອມແປງໂຮງຮຽນ, ໃຫ້ເດັກນ້ອຍນັກຮຽນປະຖົມບ້ານພ້າ ແລະບ້ານກຸມເທື່ອ,  ຊຶ່ງກ່ອນໜ້ານີ້ຂັ້ນເມືອງ ໄດ້ຂຽນແຜນສເນີຂໍທຶນ ມາສ້ອມແປງໂຮງຮຽນ ຍ້ອນຫຼິງເຫັນເຖິງຄວາມ ສໍາຄັນ ຂອງ ເດັກນ້ອຍນັກຮຽນ ຢູ່ຊົນບົດຫ່າງໄກຢາກໃຫ້ໄດ້ຮຽນ ຄືກັບນັກຮຽນເຂດອື່ນ.

ເຖິງແມ່ນວ່າຣັຖບານ ບໍ່ໄດ້ອະນຸມັດງົບປະມານ ສ້ອມແປງໂຮງຮຽນປະຖົມ ບ້ານພ້າແລະບ້ານກຸມ ກໍຕາມ, ແຕ່ຣັຖບານ ກໍມີງົບປະມານ ສ່ວນບໍຣິຫານ ຕາມຫົວໜ່ວຍເດັກນ້ອຍນັກຮຽນ 50 ພັນກີບ ຕໍ່ຄົນຕໍ່ປີ, ແຕ່ກໍຍັງບໍ່ພໍ, ດັ່ງເຈົ້າໜ້າທີ່ຜູ້ດຽວກັນນີ້ ກ່າວຕື່ມວ່າ:

“50 ພັນກີບ ຕໍ່ຄົນຕໍໍ່ປີ ບໍ່ພໍແຫຼະເນາະ, ມັນຈະບໍຣິຫານດ້ານວິຊາການ ຫັ້ນເປັນສ່ວນໃຫຍ່ ເປັນການປະຊຸມບໍ ຫຼືວ່າບໍຣິການວຽກອື່ນ, ກ່ຽວກັບການຮຽນການສອນເປັນຄຣູ, ກໍ່ມີສ່ວນໃດສ່ວນນຶ່ງ ເຂົາເຈົ້າແບ່ງກັນໃຊ້ເນາະ ສົມທົບກັບທຶນຂອງຊາວບ້ານ ມີການສ້ອມແປງ ເລັກໆນ້ອຍໆ ກໍ່ໄດ້ໃຊ້ສ່ວນນັ້ນແດ່.”

ໂຮງຮຽນປະຖົມບ້ານພ້າ ແລະບ້ານກຸມ, ສ້າງມາດົນກວ່າ 20 ປີແລ້ວ, ປັດຈຸບັນ ມີເດັກນ້ອຍນັກຮຽນທັງໝົດ 100 ຄົນ, ສ່ວນໃຫຍ່ເປັນ ເດັກນ້ອຍນັກຮຽນຢູ່ຊົນບົດ ຫ່າງໄກສອກຫຼີກ, ຜ່ານມາເວລາໂຮງຮຽນເປ່ເພ ຊາວບ້ານຈະຊ່ອຍກັນສ້ອມແປງ ປີລະເລັກລະໜ້ອຍພໍໃຫ້ ເດັກນ້ອຍໄດ້ຮຽນໜັງສື.

ຄໍາເຫັນ (2)
Share

(

ແມ້ແຕ່ງົບຈະມາສ້ອມແປງໂຮງຮຽນ ກໍວ່າບໍ່ມີແລ້ວນໍ້, ຄິດເອົາເດີພວກນ້ອງໆນັກຮຽນທັງຫຼາຍ, ຢ່າຊຸໄປຄິດວ່າສິເອົາຫຼັງໄໝ່, ຂ້ອຍເອງກໍຜູ້ນື່ງທີ່ເຂົ້າໂຮງຮຽນ ທີ່ບໍມີຝາແອ້ມ ແລະເມື່ອຝົນຕົກມາລົມພັດເອົານໍ້າເຂົ້າມາ ເຮັດໄຫ້ພື້ນໂຮງຮຽນເປັນຕົມ ແລະ ຂ້ອຍທົນມາແບບນີ້ຈົນ ຈົບປະຖົມ, ສະນັ້ນຂ້ອຍຢາກຂໍຮ້ອງ ຫຼືຂໍຄວາມຊ່ວຍເຫຼືອ ຈາກກະຊວງພະລັງງານໄຟຟ້າແດ່ ຫຼືວ່າກະຊວງບໍ່ແຮ່ກໍໄດ້ ຄືໄຫ້ຊື້ຕາປູ ແລະສັງກະສີໄຫ້ກໍໄດ້ ພວກຂອ້ຍຈະສ້ອມເອງ ທ່ານ, ຕາມທີ່ຂອ້ຍໄດ້ຍິນຂ່າວວ່າ ສອງກະຊວງນີ້ ມີງົບຫຼາຍກ່າວໝູ່ ຄືມີການຂຸດຄົ້ນບໍ່ແຮ່ ທົ່ວປະເທດ ແລະສ້າງເຂື່ອນໄກ້ສິຮອດ 100 ເຂື່ອນແລ້ວ ຢູ່ໃນລາວສະນັ້ນ ຂໍຊໍ່ານີ້ສິບໍ່ໄດ້ບໍທ່ານ,


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 13, 2019 07:35 AM

(

Lao party-state, why don't you sell this part of Laos to China so it can take care of it? Don't waste your time since you're not capable of doing something good for your country. Besides Laos will be under Chinese or Vietnamese authorities anyway.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 07, 2019 05:50 AM

ເຕັມຫນ້າ