ຜູ້ນໍາເກົາຫລີໃຕ້ ຈະໄປ ສປປ ລາວ

2019-08-28
ອີແມວລ໌
ຄໍາເຫັນ
Share
ພິມ
ວັນທີ 15 ສິງຫາ 2019-ປະທານາທິບໍດີ ເກົາຫລີໃຕ້ ທ່ານ ມູນ ແຈ-ອິນ(ກາງ)ແລະ ພັລຍາ(ຂວາ) ຮ່ວມກັນເຄົາຣົບທຸງຊາດ ໃນພິທີ ສລອງວັນຄົບຮອບ 74 ປີ ທີ່ໄດ້ຮັບເອກກະຣາດ ຈາກ ຍິ່ປຸ່ນ
ວັນທີ 15 ສິງຫາ 2019-ປະທານາທິບໍດີ ເກົາຫລີໃຕ້ ທ່ານ ມູນ ແຈ-ອິນ(ກາງ)ແລະ ພັລຍາ(ຂວາ) ຮ່ວມກັນເຄົາຣົບທຸງຊາດ ໃນພິທີ ສລອງວັນຄົບຮອບ 74 ປີ ທີ່ໄດ້ຮັບເອກກະຣາດ ຈາກ ຍິ່ປຸ່ນ
AFP

ໂຄສົກຣັຖບານເກົາຫຼີໃຕ້ ໄດ້ແຈ້ງເມື່ອວັນທີ 25 ສິງຫາ ຜ່ານມາ ວ່າ ໃນຣະຫວ່າງ ວັນທີ 1-6 ເດືອນກັນຍາ 2019  ທ່ານ ມູນ ແຈ-ອິນ ປະທານາທິບໍດີ ເກົາຫຼີໃຕ້ ມີແຜນຈະເດີນທາງໄປຢ້ຽມຢາມ ຣັຖກິດບັນດາປະເທດອາຊຽນເຊັ່ນ ສປປລາວ, ໄທ ແລະ ພະມ້າ. ໃນນັ້ນໂຄສົກ ຣະບຸວ່າ ທ່ານ ມູນ ແຈ ອີນ ຈະຢ້ຽມຢາມລາວ ໃນຣະວ່າງ ວັນທີ 05-06 ເດືອນກັນຍາ 2019. ດັ່ງເຈົ້າໜ້າທີ່ກະຊວງການຕ່າງປະເທດ ລາວ ໄດ້ກ່າວຕໍ່ RFA ໃນວັນທີ 27 ສິງຫາ ວ່າ:

"ໂຕນີ້ເພິ່ນຈະມາຢາມ ຢ້ຽມຢາມ ຊ່ວງຕົ້ນເດືອນໜ້າເຈົ້າ ແມ່ນວັນທີ 5- 7 ສິງຫາ ຢູ່ແຕ່ນະຄອນຫຼວງ ໂຕນີ້ແຜນເຮົາກໍຍັງບໍ່ໄດ້ອັນນັ້ນ ເທື່ອເນາະ."

ການຢ້ຽມຢາມລາວ ຄັ້ງນີ້ ປະທາທິບໍດີ ມູນ ແຈ-ອີນ ຈະໄດ້ພົບກັບ ທ່ານ ບຸນຍັງ ວໍລະຈິດ ປະທານປະເທດ ສປປ ລາວ, ພົບກັບ ທ່ານ ທອງລຸນ ສີສຸລິດ ນາຍົກຣັຖມົນຕຣີ ສປປ ລາວ ໂດຍຈະໄດ້ປຶກສາຫາລື ກ່ຽວກັບການຮ່ວມມື ດ້ານພລັງງານນ້ຳ ແລະ ການປັບປຸງ ຄຸນນະພາບຊີວິດ ການເປັນຢູ່ຂອງຄົນລາວ.

ນອກຈາກການຢ້ຽຢາມລາວ ໃນວັນທີ 1-3 ກັນຍາ 2019 ປະທານາທິບໍດີເກົາຫຼີໃຕ້ ຈະເດີນທາງ ຢ້ຽມຢາມໄທ ພົບກັບ ທ່ານ ປຣະຍຸດ ຈັນໂອຊາ ນາຍົກຣັຖມົນຕຣີໄທ ໂດຍທ່ານ ມູນ ແຈ-ອິນ ຈະປືກສາຫາລື ເຖິງເຣື່ອງການຈັດການ ປະຊຸມສຸດຍອດ ເກົາຫຼີ-ແມ່ຂອງ ທີ່ ບູຊານ ໃນເດືອນພືສຈິກາ ປີນີ້ ໃນນັ້ນຈະມີ ວຽດນາມ, ລາວ, ໄທ, ພະມ້າ ແລະ ກັມພູຊາ ເຂົ້າຮ່ວມກອງປະຊຸມ.

ສ່ວນວັນທີ 03-05 ປະທານາທິບໍດີ ເກົາຫຼີໃຕ້ ຈະເດີນທາງຢ້ຽຢາມ ພະມ້າ ພົບກັບ ຍານາງ ອອງ ຊານ ຊູ ຈີ ທີ່ປືກສາແຫ່ງຣັຖ ແລະ ປະທານາທິບໍດີ ວີນ ມະຍີນ ອອງ ເພື່ອປຶກສາຫາລືກ່ຽວກັບ ການຮ່ວມມືແບບຍືນຍົງ ແລະ ວາງພື້ນຖານເພື່ອໃຫ້ ເກົາຫຼີໃຕ້ ສາມາດ  ຂຍາຍການລົງທຶນເຂົ້າ ໃນພະມ້າ ໃນອະນາຄົດ.

ການເດີນທາງຢ້ຽມຢາມ ປະເທດອາຊຽນ ລຸ່ມແມ່ນ້ຳຂອງ  ຂອງ ປະທະນາທີບໍດີ ເກົາຫຼີໃຕ້ຄັ້ງນີ້  ໂຄສົກຣັຖບານ ໄດ້ເໜັ້ນຢ້ຳວ່າ ໄທ, ພະມ້າ ແລະລາວ ແມ່ນນຶ່ງໃນການຜັກດັນ ນະໂຍບາຍໃໝ່ຕໍ່ອາຊຽນ ແລະ ຈຸດທີ່ສຳຄັນນັ້ນ ຂຶ້ນຢູ່ກັບຜົນສຳເຣັດຂອງ ກອງປະຊຸມສຸດຍອດ ເກົາຫຼີ-ແມ່ຂອງ ໃນເດືອນ ພືສຈິກາ ທີ່ຈະມາເຖີງນີ້.

ເຕັມຫນ້າ