ຊາວໄທ 8 ແຂວງ ລຸ່ມນ້ຳຂອງ ຂໍຄວາມເປັນທັມ

ຈໍາປາທອງ
2019-07-26
ອີແມວລ໌
ຄໍາເຫັນ
Share
ພິມ
ເຄືອຂ່າຍ ປະຊາຊົນໄທ 8 ແຂວງ ລຸ່ມແມ່ນ້ຳຂອງ ຍື່ນໜັງສື ຕໍ່ສານປົກຄອງໄທ ເພື່ອຂໍໃຫ້ສານສັ່ງໂຈະ ການຊື້ໄຟຟ້າ ຈາກ ເຂື່ອນໄຊຍະບູຣີ
ເຄືອຂ່າຍ ປະຊາຊົນໄທ 8 ແຂວງ ລຸ່ມແມ່ນ້ຳຂອງ ຍື່ນໜັງສື ຕໍ່ສານປົກຄອງໄທ ເພື່ອຂໍໃຫ້ສານສັ່ງໂຈະ ການຊື້ໄຟຟ້າ ຈາກ ເຂື່ອນໄຊຍະບູຣີ
RFA

ຜູ້ຕາງໜ້າເຄືອຂ່າຍປະຊາຊົນໄທ 8 ແຂວງລຸ່ມແມ່ນ້ຳຂອງພ້ອມກັບ ທະນາຍຄວາມ ຍື່ນໜັງສືຕໍ່ສານປົກຄອງ ສູງສຸດຂອງໄທ ເພື່ອຂໍໃຫ້ ສານ ພິຈະຣະນາ ສັ່ງ ບຳບັດ ຜົນກະທົບຊົ່ວຄາວ ແລະ ສັ່ງໃຫ້ທາງການໄທ ໂຈະການຊື້ໄຟຟ້າ ຈຳນວນ 1,220 MW ຈາກ ເຂື່ອນ ໄຊຍະບູຣີ ທີ່ໄດ້ເຮັດໃຫ້ເກີດຜົນກະທົບ ຕໍ່ນ້ຳຂອງຮຸນແຮງ; ດັ່ງທີ່ທ່ານ ຊານນະຣົງ ວົງລາ ປະຊາຊົນລຸ່ມແມ່ນ້ຳຂອງ ແຂວງເລີຍຂອງໄທ ເວົ້າຕໍ່ສື່ມວນຊົນ ໃນມື້ວັນທີ 26 ກໍຣະກະດາ ນີ້ວ່າ:

"ທ່ານກ່າວວ່າ; ເຫດຜົນທີ່ມາຍື່ນໜັງສືຕໍ່ສານໃນມື້ນີ້ ອັນທຳອິດຄືພວກເຮົາເຫັນຜົນກະທົບ ຈາກ ເຂືຶ່ອນໄຊຍະບູຣີ ທີ່ເລິ້ມທົດລອງຜລິດ ໄຟຟ້າ ພໍເຫັນຜົນກະທົບແລ້ວ ຢາກໃຫ້ສານສັ່ງໂຈະ ການຊື້ໄຟຟ້າ ຫລື ຫາມາຕການບຳບັດ ຜົນກະທົບ ອັນນີ້ຄືເຫດຜົນ."

ແລະ ນາງ ຣັດຕະນະມະນີ ພົນກ້າ ທະນາຍຄວາມຂອງເຄືອຂ່າຍ ປະຊາຊົນໄທ 8 ແຂວງ ລຸ່ມແມ່ນ້ຳຂອງ ກໍໄດ້ກ່າວໃນມື້ດຽວກັນນັ້ນວ່າ ໃນໄລຍະຕົ້ນເດືອນນີ້ ຊຶ່ງກົງກັບໄລຍະ ທີ່ເຂື່ອນໄຊຍະບູລີ ທົດລອງເຄື່ອງປັ່ນໄຟ ໜ່ວຍທີ 5 ພົບວ່າ ຣະດັບນ້ຳຂອງ ທ້າຍເຂື່ອນໄຊຍະບູລີ ຫລຸດລົງຫລາຍ ແບບຜິດປົກກະຕິ, ດັ່ງນັ້ນຈຶ່ງເຊື່ອວ່າເປັນ ຜົນກະທົບໂດຍກົງ ຈາກ ເຂື່ອນໄຊຍະບູຣີ ດັ່ງທີ່ນາງກ່າວວ່າ:

"ນາງກ່າວວ່າ ມັນໜ້າຈະມີຜົນໂດຍກົງ ກັບການທີ່ມີການຜລິດໄຟຟ້າ ຊຶ່ງການຜລິດໄຟຟ້າ ກໍເຊື່ອມຕໍ່ ກັບການທີ່ມີການຊື້ໄຟຟ້າ ໂດຍການ ໄຟຟ້າຝ່າຍຜລິດ ແຫ່ງປະເທດໄທ ຊຶ່ງເຊື່ອມຕໍ່ກັບຄະດີນີ້ ເຮົາກໍເລີຍຢາກໃຫ້ສານ ໄດ້ມີການໄຕ່ສວນ ເພື່ອນຳ ເອົາຂໍ້ມູນທັງໝົດ ເຂົ້າສູ່ ຂະບວນການ ທີ່ຈະຄຸ້ມຄອງຊົ່ວຄາວ."

ນາງກ່າວຕື່ມອີກວ່າ ຫາກເຂື່ອນໄຊຍະບູຣີ ໄດ້ດໍາເນີນການຜລິດໄຟຟ້າເຕັມສ່ວນ ນັບຕັ້ງແຕ່ເດືອນຕຸລາ ປີນີ້ເປັນຕົ້ນໄປ ຈະເຮັດໃຫ້ເກີດຜົລ ກະທົບ ຮ້າຍແຮງ ຕໍ່ທັມມະຊາດ, ສິ່ງແວດລ້ອມ ແລະປະຊາຊົນ ໃນເຂດລຸ່ມແມ່ນໍ້າຂອງ. ດັ່ງນັ້ນ ສັນຍາຊື້-ຂາຍ ໄຟຟ້າ ຈະເຮັດໃຫ້ ປະຊາຊົນ ໄດ້ຮັບຄວາມເດືອດຮ້ອນ ຢ່າງຫລີກລ່ຽງບໍ່ໄດ້.

ປັດຈຸບັນ ເຂື່ອນໄຟຟ້າໄຊຍະບູຣີ ຢູ່ໃນຂັ້ນຕອນ ຂອງການທົດລອງຜລິດໄຟຟ້າ ໜ່ວຍທີ 6 ແລະ ຈະເລີ່ມທົດລອງ ໜ່ວຍທີ່ 7 ໃນ ເດືອນໜ້າ ຊຶ່ງທາງກຳມະການ ຜູ້ຈັດການບໍຣິສັດ CK Power ແລະກຳມະການ ຜູ້ຈັດການ ເຂື່ອນໄຊຍະບູຣີ Power ໄດ້ຢືນຢັນວ່າ ຈະມີການເປີດການຜລິດໄຟຟ້າ ເຕັມຮູບແບບ ຢ່າງແນ່ນອນ ໃນເດືອນຕຸລາ ທີ່ຈະມາເຖິງນີ້.

ເຕັມຫນ້າ