ແຮງງານລາວ ຜິດກົດໝາຍ ໃນໄທ 2 ແສນກ່ວາ ຄົນ

ກະຊວງ ປ້ອງກັນ ຄວາມສະງົບ ເປີດເຜີຍວ່າ ຈໍານວນ ຄົນລາວ ທີ່ເຂົ້າໄປ ເຮັດການ ແບບຜິດກົດໝາຍໃນໄທ ອາດມີຫລາຍກວ່າ 2 ແສນຄົນ.
ໂພໄຊສວັດ ຣາຍງານ
2008-12-23
ອີແມວລ໌
ຄໍາເຫັນ
Share
ພິມ

ທ່ານ ກຽງ​ຄໍາ ອິນ​ແພງ​ທະ​ວົງ ຫົວໜ້າ​ກົມ ສືບສວນ ສອບ​ສວນ ​ໄດ້​ເປີດ​ເຜີຍ ຜ່ານ​ກອງ​ປະຊຸມ ການ​ຊ່ອຍ​ເຫລືອ ຜູ້​ເຄາະ​ຮ້າຍ ຈາກ​ການ​ຄ້າ ມະນຸດ ​ໂດຍ​ສະ​ເພາະ ພວກ​ທີ່​ລັກລອບ ​ເຂົ້າ​ໄປ​ເຮັດ​ວຽກ​ແບບ​ຜິດ​ກົດໝາຍ ​ໃນ​ໄທ ຮວມທັງ ພວກ​ລັກລອບ​ ເຂົ້າ​ໄປ ຂາຍ​ບໍລິການ ຕັ້ງ​ແຕ່ ​ປີ 2005 ​ເຖິງ ​ປັດຈຸບັນ​ນີ້ ວ່າ ມີ​ໂຕ​ເລກ 2 ກ່ວາ​ແສນ​ຄົນ.

ສໍາລັບ ​ຜູ້ຍິງ​ ທີ່​ໄປ​ເຮັດ​ການ ຢູ່​ປະ​ເທດ​ໄທ ​ໂດຍ​ບໍ່ມີ​ໜັງສື​ ຄົບ​ຖ້ວນ, ສ່ວນ​ຫລາຍ ​ເຮັດ​ວຽກ​ປະ​ເພດ ​ແມ່​ບ້ານ, ​ໂຮງຈັກ​ໂຮງງານນ້ອຍໆ ​ແລະ ຕາມ​ຮ້ານ​ອາຫານ. ດັ່ງ ຍິງ​ສາວລາວ ຜູ້​ນຶ່ງ​ຈາກ ​ແຂວງ​ໄຊ​ຍະ​ບຸລີ​ ​ໄດ້ເວົ້າ ກ່ຽວ​ກັບ ​ການ​ເຂົ້າ​​ໄປ​ເຮັດ​ວຽກ ​ໃນ​ໄທ ​ວ່າ:

“ເຫັນ​ໝູ່​ມາ ກໍ​​ເລີຍຢາກ​ມາ ໝູ່​ມາ​ຫລາ ຫາ​ເງິນ​ກ່ອນ ລະຍະ​ນຶ່ງ ກັບ​ປີໜ້າ ​ໄປ​ເຮັດ​ໄຮ່​ເຮັດ​ນາ ​ເໝືອນ​ເດີມ.”

ສ່ວນ​ທາງ​ການ​ໄທ ກໍ​ໃຫ້​ ລາຍ​ລະອຽດ ​ວ່າ ມີ​ໂຕ​ເລກ ​ໃກ້​ຄຽງ ​ກັບ​ຝ່າຍ​ລາວ ​ແລະ ຢາກ​ໃຫ້​ຄົນ​ງານ ​ເລົ່າ​ນີ້ ​ເຂົ້າ​ມາ ​ແບບ​ຖືກຕ້ອງ​ ຕາມ​ກົດໝາຍ ດັ່ງ ທ່ານ ວະສັນ ສາທອນ ອະທິບໍດີ ສໍານັກ ບໍລິຫານ ​ແຮງ​ງານ ​ຕ່າງ​ດ້າວ ​ເວົ້າ​ວ່າ:

“ຂະນະ​ນີ້ ມີ​ຜູ້​ຕົກ​ຄ້າງ​ຢູ່ ຢ່າງ​ຫລວງຫລາຍ ​ເຮົາ​ຈະ​ດໍາ​ເນີນ ​ການ​ແບບ​ໃດ ກັບ​ຜູ້​ທີ່ ​ເຮັດ​ວຽກ​ຢູ່ ລັກ​ເຂົ້າ​ເມືອງ ​ແລ້ວ​ກໍ​ຢູ່​ໂດຍ ບໍ່​ໄດ້​ເຂົ້າ ​ໃນ​ລະບົບ ໜ່ວຍງານ ​ທີ່​ກ່ຽວຂ້ອງ ກໍ​ບອກ​ວ່າ ​ເຫລືອ​ຢູ່ ຫລາຍ​ແສນ​ຄົນ.”

ສໍາລັບ ​ຄົນ​ງານ​ຕ່າງ​ດ້າວ ສັນຊາດ​ລາວ ທີ່​ບໍ່​ໄດ້​ຮັບ ​ອະນຸຍາດ ຕາມ​ສະຖິຕິ​ ຂອງ​ໄທ ​ເຫັນ​ວ່າ ມີ​ແຕ່ 12,800 ຄົນ ​ຊຶ່ງ​ບໍ່​ຖືກຕ້ອງ ​ກັບ​ສະພາບ​ ຄວາມ​ເປັນ​ຈິງ​ ທີ່​ຄາດ​ວ່າ ມີ​ກວ່າ 2 ​ແສນ​ຄົນ.

ບັນຫາ​ ດັ່ງກ່າວ ສົ່ງ​ຜົນ​ກະທົບ ​ຫລາຍໆ​ດ້ານ ມາສູ່​ປະ​ເທດ ບໍ່​ວ່າ ທາງລາວ ຫລື ​ໄທ ​ເຊັ່ນ​ບັນຫາ ​ເສດ​ຖະກິດ ​ແລະ ສັງຄົມ. ສໍາລັບ​ ໂຕ​ເລກ ​ຂອງ​ຜູ້​ທີ່ ​ໄດ້​ຮັບ​ການ​ຊ່ອຍ​ເຫລືອ ຈາກ​ທາງ​ການ​ໄທ ນັບ​ແຕ່​ປີ 2001 ຈົນ​ເຖິງ ​ປັດຈຸບັນ ມີ 1,229 ຄົນ ​ເປັນ​ຍິງ 1,172 ຄົນ ​ແລະ ພົບ​ວ່າ 65 ສ່ວນ​ຮ້ອຍ ມີ​ອາຍຸ​ຕໍ່າ​ກວ່າ 18 ປີ.


ເຕັມຫນ້າ