ວັນທີ 29 ເດືອນ ພຶສະຈິກາ ປີ 2006

2006-11-29
ອີແມວລ໌
ຄໍາເຫັນ
Share
ພິມ

ມື້ນີ້ເປັນມື້ຕອບຈມ. ຂອງບັນດາທ່ານຜູ້ຟັງ ທີ່ຂຽນເຖິງສະຖານີ ວິທຍຸເອເຊັຽເສຣີ ຂອງພວກເຮົາ ແລະ ຂ້າພເຈົ້າ ມະນີຈັນ ໄດ້ຖຶກມອບໝາຍ ໃຫ້ເປັນຜູ້ຈັດຣາຍການ ຕອບຈມ. ຂອງພວກທ່ານ ໃນມື້ນີ້ ເຖີງວ່າສຽງບໍ່ມ່ວນ ບໍ່ອ່ອນຫວານ ກໍຂໍໃຫ້ທ່ານຜູ້ຟັງອົດຟັງເອົາເນາະ.

ອີເມລສບັບທຳອິດ ແມ່ນມາຈາກທ່ານ “ອີວາຣ໌ ແນວເຊີນ” ເຂົ້າໃຈວ່າ ຄົງຈະເປັນ ຄົນຕ່າງປະເທດ ເພີ່ນຂຽນວ່າ:

ໄດ້ສົ່ງປື້ມ ທີ່ໃຫ້ຊື່ເປັນພາສາອັງກິດວ່າ I little slaves ຊື່ງອາດແປເປັນ ພາສາລາວ ໄດ້ວ່າ “ນັກໂທດຜູ້ໜຸ່ມນ້ອຍ” ຂຽນໂດຍ ”ທ່ານ ບຸນສາງ ຄຳແກ້ວ” ຊຶ່ງທາງ Eastern Washington University Press…? ໄດ້ພິມອອກເຜີຍແຜ່ ເມື່ອບໍ່ນານມານີ້ ທ່ານອີວາ ແນວເຊີນ ໃນນາມ ຜູ້ອຳນວຍການ Eastern Washington University Press…? ຈາກ ຣັຖວໍຊິງຕັນ ສະຫະ ຣັຖອະເມຣິກາ ໄດ້ກ່າວເຖິງ ປື້ມນັ້ນວ່າ ເປັນປື້ມ ຄວາມຊົງຈຳ ກ່ຽວກັບຊີວິດໃນຄຸກຄຸມຂັງໃນລາວ ຂອງທ່ານບຸນສາງ ຄຳແກ້ວ ເປັນເວລາ ນານເຖິງ 7 ປີ ພາຍໃຕ ້ຣະບອບ ການປົກຄອງຂອງລາວ ປັດຈຸບັນ ທ່ານບຸນສາງ ຄຳແກ້ວ ຈົບການສຶກສາຂັ້ນປຣິນຍາເອກ PSD ຂແນງວິທຍາ ສາດການເມືອງ ທີ່ຝຣັ່ງເສດ ໄດ້ກັບຄືນປະເທດລາວ ໃນປີ 1973 ຊຶ່ງເປັນໄລຍະ ສະພາບ ຫົວລ້ຽວຫົວຕໍ່ ຢູ່ປະເທດລາວໃນເວລານັ້ນ. ໃນປື້ມດັ່ງກ່າວ ທ່ານບຸນສາງ ໄດ້ເລົ່າເຖິງ ສະພາບ ການຕໍ່ສູ້ ຂອງທ່ານ ເພື່ອຄວາມຢູ່ລອດ ຢູ່ໃນຄຸກຄຸມຂັງ ຖ້າມກາງການຖຶກ ທໍຣະມານ ທາງດ້ານຮ່າງກາຍ ແລະ ຈິດໃຈ ຢ່າງໜັກໜ່ວງ ທ່ານອີວາຣ໌ ແນວເຊີນ ເຫັນວ່າປື້ມຫົວດັ່ງກ່າວ ມີຄວາມສຳຄັນຫຼາຍ ສະທ້ອນ ໃຫ້ເຫັນ ເຖີງການກົດດັນ ທາງການເມືອງ ແລະ ການຣະເມີດ ສິດທິມະນຸດ ທີ່ກຳລັງ ເປັນບັນຫາ ຟົດຟື້ນ ຢູ່ໃນ ໂລກປັດຈຸບັນ.

ພວກເຮົາທາງຄນະ ວິທຍຸເອເຊັຽເສຣີຜແນກ ພາສາລາວ ກໍຂໍຂອບໃຈ ທ່ານ ”ອີວາ ແນວເຊີນ” ເປັນຢ່າງສູງ ທີ່ໄດ້ຂ່າວ ແລະ ໄດ້ສົ່ງປື້ມນັ້ນມາໃຫ້ພວກເຮົາ ແລະ ພ້ອມກັນນີ້ ເນື່ອງຈາກວ່າ ປື້ມທີ່ທ່ານ ສົ່ງມາ ໃຫ້ພວກຂ້າພະເຈົ້າ ນັ້ນຍັງມາ ບໍ່ທັນຮອດທັນເຖີງ ຈຶ່ງບໍ່ແນ່ໃຈວ່າ ການແປຊື່ ປື້ມ I little slaves ມາເປັນ ພາສາລາວວ່າ “ນັກໂທດຜູ້ໜຸ່ມນ້ອຍ” ນັ້ນ ຈະຖຶກຫຼືບໍ່?. ຕາມຈິຕໃຈຂອງຜູ້ຂຽນ ແຕ່ຖ້າແປຕາມ ໂຕກໍຄື “ຂ້ອຍເປັນ ຂ້າທາສນ້ອຍຜູ້ນຶ່ງ” ແຕ່ເຖີງແນວໃດກໍດີ ກໍຫວັງວ່າ ຄົງໄດ້ຮັບການ ອະໄພ ຈາກທ່ານເນາະ. ທ່ານຜູ້ຟັງ ທີ່ເຄົາຣົບ ເພື່ອເປັນການ ປ່ຽນບັນຍາກາດ ຂ້າພະເຈົ້າຈະນຳເອົາເພັງລາວສໄມທີ່ໃຫ້ຊື່ວ່າ “ຈົ່ງລືມເສັຍທີ” ຂັບຮ້ອງໂດຍທ່ານ “ພົມມະ ພິມມະສອນ” ສິນລະປິນລາວ ຣຸ່ນອາວຸໂສມາ ກ່ອມອາລົມທ່ານ ຂໍເຊີນທ່ານຮັບຟັງໄດ້.

---------------- (ເພັງ) ------------------

ເປັນຈັງໃດທ່ານຜູ້ຟັງເພັງທີ່ຈົບລົງໄປນັ້ນ ຄິດວ່າ ຄົງສ້າງ ຄວາມອະພິຣົມ ສຳຣານ ໃຫ້ແກ່ທ່ານ ບໍ່ຫຼາຍ ກໍໜ້ອຍເນາະ.

ອີເມລສບັບຕໍ່ໄປແມ່ນຂຽນຈາກທ່ານ “ອະນຸສັກ ທັມມະວົງສາ” ທີ່ຂຽນມາອວຍພອນວ່າ:

ເນື່ອງໃນວັນຂອບຄຸນພຣະເຈົ້າ ຫຼື ວັນ Thanks Giving ວັນທີ 25 ພຶສຈິກາ ໃຫ້ໂຄສົກ ທຸກຄົນ ຈົ່ງໄດ້ຮັບ ແຕ່ຄວາມສຸຂ ທຸກຢ່າງ ໃຫ້ໂຊກດີແລະມີສຸຂພາບເຂັ້ມແຂງ. ພ້ອມກັນນັ້ນ, ທ່ານກໍບອກວ່າ ພວກທ່ານ ຮູ້ສຶກດີໃຈຫຼາຍ ທີ່ໄດ້ມີການອອກອາກາດກ່ຽວກັບຂ່າວຄາວຕ່າງໆ ເຊັ່ນນີ້ ແລະກໍຂໍໃຫ້ສຶບຕໍ່ໄປ ວ່າຊັ້ນ.

ຕໍ່ຄຳອວຍພອນ ແລະ ຄຳເຫັນຂອງທ່ານ ທາງຄນະພວກເຮົາ ກໍຂໍຂອບໃຈຢ່າງສູງ ແລະ ພວກເຮົາ ຂໍໃຫ້ພອນນັ້ນ ຈົ່ງບັງເກີດ ແກ່ທ່ານເຊັ່ນກັນ ແລະ ພວກຂ້າພະເຈົ້າ ກໍ່ຈະພຍາຍາມ ເຮັດໃຫ້ ຣາຍການ ອອກອາກາດ ຂອງ ພວກຂ້າພະເຈົ້າສືບຕໍ່ເປັນທີ່ນິຍົມ ມີສາຣະປໂຍດສຳຫຼັບພວກທ່ານຕໍ່ໄປ ແລະ ກໍຫວັງຢ່າງຍິ່ງວ່າ ຈະໄດ້ຮັບກຳລັງໃຈ ຈາກທ່ານຕື່ມອີກເນາະ.

ກ່ອນຈາກກັນໃນວັນນີ້ ຂ້າພະເຈົ້າຂໍແຈ້ງຂ່າວ ໃຫ້ບັນດາທ່ານຜູ້ຟັງ ຣາຍການ ຂອງພວກເຮົາຊາບວ່າ ບໍ່ເມື່ອດົນມານີ້ ທ່ານບຸນທັນ ຣັຕຕິຍາ ປະທານຈັດການປະທ້ວງທີ່ 2 ທັນວາ ປີ 2006 ໄດ້ສົ່ງໜັງສື ແຈ້ງໃຫ້ ທາງວິທຍຸ ເອເຊັຽເສຣີ ຜແນກພາສາລາວ ຂອງພວກເຮົາວ່າ ໃນວັນເສົາທີ 2 ທັນວາ ທີ່ຈະມາເຖີງນີ້ ຈະໄດ້ມີການ ປະທ້ວງຢູ່ຕໍ່ໜ້າສຖານທູດລາວ ໃນນະຄອນ ຫຼວງວໍຊິງຕັນດີຊີ ຮ່ວມກັບພັນທະມິຕ ແລະ ອົງການ ຂອງ ປະເທດເພື່ອນບ້ານ ການປະທ້ວງຈະເລີ້ມແຕ່ເວລາບ່າຍ 2 ໂມງ ເຖີງ 6 ໂມງແລງ ພ້ອມກັນນັ້ນ ທ່ານຍັງຂໍເຊີນຊວນ ບັນດາທ່ານທັງຫຼາຍ ຈົ່ງສລະເວລາໄປເຂົ້າຮ່ວມ ການຊຸມນຸມປະທ້ວງຄັ້ງນີ້ນຳດ້ວຍ ໃນການຈັດການປະທ້ວງຄັ້ງນີ້ແມ່ນອົງການຮ່ວມພລັງລາວຕໍ່ສູ້ເພື່ອປະຊາທິປະໄຕໃນລາວ ເປັນຄນະຈັດຕັ້ງຮ່ວມກັບອົງການຂເມນເສຣີ ອົງການວຽດນາມເສຣີ ແລະ ອົງການຈີນເສຣີ.

ທ່ານຜູ້ຟັງທີ່ເຄົາຣົບ ຈະວ່າໄປແລ້ວໃນແຕ່ລະປີກໍໄດ້ມີການຈັດການຊຸມນຸມປະທ້ວງທາງການລາວ ຢູ່ຕໍ່ໜ້າສຖານທູດລາວທີ່ນະຄອນຫຼວງວໍຊິງຕັນດີຊີ ເນື່ອງໃນໂອກາດຕ່າງໆ ເປັນຕົ້ນແມ່ນໃນໂອກາດບຸນປີໃໝ່ລາວ ວັນປ່ຽນແປງຣະບອບຣາຊອານາຈັກເປັນສາທາຣະນະຣັຖ ວັນທີ 2 ທັນວາ ຊຶ່ງອົງການຈັດຕັ້ງເພື່ອປະຊາທິປະໄຕ ແລະສິດທິມະນຸດຊາວລາວຢູ່ຕ່າງປະເທດ ຖືວ່າເປັນວັນທີ່ນຳຄວາມສູນເສັຽມາສູ່ປະເທດຊາຕແລະ ປະຊາຊົນລາວຢ່າງມະຫັນນັ້ນ ແຕ່ສຳຫັຼບປີນີ້ກໍປາກົດວ່າ ການຊຸມນຸມປະທ້ວງມີຄວາມໝາຍສຳຄັນຂຶ້ນກວ່າແຕ່ກ່ອນ ເນື່ອງຈາກມີຂບວນຕໍ່ສູ້ເພື່ອເສຣີພາບຂອງປະເທດເພື່ອນບ້ານເຂົ້າຮ່ວມເຄື່ອນໄຫວນຳ.

ທ່ານຜູ້ຟັງທີ່ເຄົາຣົບ ໃນທ້າຍຣາຍການຕອບຈມ.ຂອງບັນດາທ່ານຜູ້ຟັງໃນມື້ນີ້ ຂ້າພເຈົ້າຂໍນຳເອົາເພັງທີ່ໃຫ້ຊື່ວ່າ “ຢ່າແບ່ງໃຈຮັກໄປຈາກນ້ອງ” ຂັບຮ້ອງໂດຍ “ສຸພະເນດ ທັມມະວົງສາ” ມາກ່ອມອາລົມທ່ານ ຂໍເຊີນທ່ານຮັບຟັງໄດ້.

---------------(ເພັງ)------------------

ທີ່ຈົບລົງໄປນັ້ນຄືເພັງ “ຢ່າແບ່ງໃຈຮັກໄປຈາກນ້ອງ” ຂັບຮ້ອງໂດຍ “ສຸພະເນດ ທັມມະວົງສາ” ຫວັງວ່າ ຄົງຖຶກໃຈ ທ່ານບໍ່ຫຼາຍ ກໍໜ້ອຍເນາະ ແລະ ກໍຫວັງວ່າ ບັນດາທ່ານ ຄົງຈະຂຽນຈມ. ຫຼື ອີເມລມາໂອ້ລົມ ແລະ ຈະຮັບຟັງ ຣາຍການ ອອກອາກາດຂອງວິທຍຸເອເຊັຽເສຣີພວກເຮົາຕໍ່ໆ ໄປ ຈມ .ທີ່ບັນດາທ່ານ ຂຽນເຖີງ ພວກເຮົານັ້ນ ແມ່ນມີຄວາມໝາຍສຳຄັນສຳຣັບພວກເຮົາໃນການປັບປຸງຣາຍການຂອງພວກເຮົາໃຫ້ດີຍິ່ງຂຶ້ນ ແລະ ກ່ອນຈາກກັນ ວັນນີ້ ຂ້າພະເຈົ້າ ພ້ອມຄນະຈັດ ຣາຍການວິທຍຸເອເຊັຽເສຣີທຸກໆ ຄົນ ຂໍ ອວຍພອນໄຊ ອັນປະເສີດ ໃຫ້ບັນດາທ່ານ ຈົ່ງປະສົບແຕ່ ຄວາມສຸຂກາຍສະບາຍໃຈ ປາຖນາສິ່ງໃດ ທີ່ຖຶກຕ້ອງ ແລະ ເປັນທັມກໍຂໍໃຫ້ໄດ້ດັ່ງຫວັງ, ສະບາຍດີ.

ຈັດສເນີທ່ານ ໂດຍ: ມະນີຈັນ

ຄໍາເຫັນ (0)
Share
ເຕັມຫນ້າ